Türkiyənin energetika naziri Naxçıvana qaz nəqlinin tezliklə başlanacağını elan edib
Ankara, 2 mart, AZƏRTAC
Türkiyənin energetika və təbii sərvətlər naziri Arparslan Bayraktar Naxçıvan Muxtar Respublikasına (NMR) təbii qazın nəqlinin tezliklə başlanacağını elan edib.
AZƏRTAC xəbər verir ki, Rusiya Federasiyasına səfəri zamanı jurnalistlərlə söhbətində türkiyəli nazir Bolqarıstan və Yunanıstandan sonra Türkiyədən Naxçıvana da mavi yanacaq tədarükünə başlanacağını vurğulayıb.
“Naxçıvan Muxtar Respublikasına qazın nəqli inşası artıq başa çatmış İğdır-Naxçıvan boru kəməri vasitəsilə həyata keçiriləcək”, - deyə energetika naziri qeyd edib.
O bildirib ki, Türkiyəyə qaz tədarükü hazırda 14 müxtəlif keçid nöqtəsindən həyata keçirilir.
Türkmən qazının alışı mövzusuna toxunan Alparslan Bayraktar qeyd edib ki, Aşqabadla əldə edilən razılaşmaya əsasən, mavi yanacağın İran vasitəsilə svop satınalma sxemi təsdiqlənib.
“Türkmən qazı Türkiyənin qaz alışına dair maliyyə yükünü azaltmağa kömək edəcək. İlkin mərhələdə 1,5 milyon abunəçinin ehtiyaclarını ödəyəcək həcmdə qaz alınması planlaşdırılır”, - deyə nazir bildirib. Bununla yanaşı, o, Trans-Xəzər boru kəmərinin inşasını “ideal variant” adlandırıb.
Ramin Abdullayev
AZƏRTAC-ın xüsusi müxbiri
Ankara
Bölmənin digər xəbərləri
