Türkiyənin maliyyə naziri Nyu-Yorkda ABŞ investorları ilə görüşüb
Ankara, 22 aprel, AZƏRTAC
Türkiyənin xəzinə və maliyyə naziri Mehmet Şimşek Nyu-Yorkda ümumi aktivləri 4 trilyon dolları keçən ABŞ-ın 25-dən çox ən böyük investisiya şirkəti və strukturunun nümayəndələri ilə görüşüb.
AZƏRTAC xəbər verir ki, Türkiyə-ABŞ Biznes Şurasının və “City Group” bankının təşkilatçılığı ilə keçirilən görüşdə Türkiyə Mərkəzi Bankının sədri Fatih Karahan da iştirak edib.
Maliyyə naziri amerikalı investorlara Türkiyə iqtisadiyyatının imkanları və üstünlükləri barədə məlumat verib, hökumətin planlarından danışıb.
Həmin gün türkiyəli nazir üç aparıcı qlobal reytinq agentliyinin rəhbərliyi ilə görüş keçirib.
M.Şimşek başda olmaqla Türkiyə nümayəndə heyəti Beynəlxalq Valyuta Fondu, G20 və Dünya Bankının tədbirlərində iştirak etmək üçün ABŞ-da səfərdədir.
Türkiyənin maliyyə nazirinin ABŞ-a səfərinin son dayanacağı Vaşinqton olacaq və burada digər tədbirlərlə yanaşı, amerikalı həmkarı Skott Bessentlə də görüş keçiriləcək.
Ramin Abdullayev
AZƏRTAC-ın xüsusi müxbiri
Ankara
Bölmənin digər xəbərləri
