Türkiyənin Şəhid Ailələri və Qaziləri Dərnəyinin rəhbəri Mərkəzi Elmi Kitabxanada olub
Bakı, 30 may, AZƏRTAC
Türkiyənin Şəhid Ailələri və Qaziləri Dərnəyinin rəhbəri Mustafa İşığ AMEA-nın Mərkəzi Elmi Kitabxanasında (MEK) olub və kitabxananın direktoru texnika elmləri doktoru Hüseyn Hüseynovla görüşüb.
Bu barədə AZƏRTAC-a MEK-dən məlumat verilib.
Əvvəlcə qonaq MEK-in Qarabağ müharibəsi qəhrəmanları fondu ilə yaxından tanış olub.
Dəyirmi masa ətrafında davam edən görüşdə MEK-in direktoru Hüseyn Hüseynov fondun yaradılması, məqsədi və fəaliyyəti barədə ətraflı məlumat verib. Direktor şəhid qardaşı olaraq fondun cəmiyyət üçün əhəmiyyətini vurğulayaraq qeyd edib ki, bu fond Vətən uğrunda mübarizə aparan qəhrəmanların tanıdılması və onların həyat yolunun gələcək nəsillərə ötürülməsi baxımından mühüm rol oynayır. Fondu təkcə şəhid və qazi ailələri deyil, həmçinin məktəblilər və tələbələr ziyarət edir, nəşrlərlə yaxından tanış olmaq imkanı əldə edirlər.
Hüseyn Hüseynov bildirib ki, hər il şəhid ailələrinin iştirakı ilə müxtəlif tədbirlər keçirilir.
Görüşdə Mustafa İşığ rəhbəri olduğu dərnəyin tarixindən söz açıb, bu qurumun XX əsrin əvvəllərində Ənvər Paşanın təlimatı ilə qurulduğunu vurğulayıb, Türkiyənin bir sıra bölgələrində şöbə və təmsilçilərinin olduğunu diqqətə çatdırıb.
Bir millət iki dövlət olaraq illərlə Azərbaycanın əzəli bölgəsi olan Qarabağın işğaldan azad olunmasına hər zaman dəstək verdiklərini, Azərbaycan və Türkiyənin şəhid ailələri arasında əlaqələrin möhkəmləndirilməsində birgə işlərin görüldüyünü diqqətə çatdıran Mustafa İşığ dövlət tərəfindən onlara göstərilən yüksək qayğının şahidi kimi işlə, evlə təmin olunmalarını yüksək dəyərləndirib.
Görüşdə “Tərxis Olunmuş Hərbçilərin Gəncləri Maarifləndirmə” İctimai Birliyinin sədri Emin Həsənli, AMEA-nın Azad Həmkarlar İttifaqının sədri dosent Sənan Həsənov, AMEA Rəyasət Heyəti aparatının Mülki müdafiə şöbəsinin müdiri Nizami Vəliyev, MEK-in Qarabağ müharibəsi qəhrəmanları fondun rəhbəri Röksanə Səfərzadə, Biblioqrafiya şöbəsinin müdiri Aytən Əliyeva dövlətin şəhid ailələrinə və qazilərə göstərdiyi xüsusi qayğını vurğulayıblar, bu sahədə həm Azərbaycanda, həm də Türkiyədə həyata keçirilən təşəbbüslərdən bəhs ediblər.
Tədbirdə, həmçinin MEK-in qazi və şəhid ailələrindən olan əməkdaşları iştirak ediblər.
Bölmənin digər xəbərləri
