Türkiyənin vitse-prezidenti inflyasiya ilə mübarizədə uğurları qeyd edib
Ankara, 3 iyun, AZƏRTAC
Türkiyə hökumətinin iqtisadi siyasəti öz bəhrəsini verir. İnflyasiya tədricən azalır, həmçinin ilin sonuna qədər ölkədə qiymət artımının 20 faizdən bir qədər yuxarı səviyyəyə enəcəyi gözlənilir. Bu, bizim aydın məqsədimizdir.
AZƏRTAC xəbər verir ki, bu barədə Türkiyənin vitse-prezidenti Cevdet Yılmazın iyunun 3-də sosial şəbəkələrdə dərc olunan məqaləsində deyilir.
O xatırladıb ki, ötən ilin iyun ayından etibarən Türkiyədə inflyasiyanın davamlı olaraq aşağı düşməsi müşahidə olunur.
Vitse-prezident qeyd edib ki, qlobal proseslər dünyada enerji və xammalın maya dəyərinin aşağı düşməsinə gətirib çıxarıb ki, bu da Türkiyə Nazirlər Kabinetinin iqtisadi kursunun məqsədlərinə nail olunmasına müsbət təsir göstərir.
C.Yılmaz pul siyasətində daha geniş struktur dəyişiklikləri və transformasiyalar aparmaq əzmini vurğulayıb.
Türkiyənin xəzinə və maliyyə naziri Mehmet Şimşek bu gün səhər saatlarında ölkədə inflyasiyanın son 12 ayda illik müqayisədə 40 faiz azaldığını bildirib.
Ramin Abdullayev
AZƏRTAC-ın müxbiri
Ankara
Bölmənin digər xəbərləri
