Türkiyənin xarici işlər naziri terrorizmlə mübarizədə səyləri birləşdirməyə çağırıb
Ankara, 22 oktyabr, AZƏRTAC
Türkiyənin xarici işlər naziri Hakan Fidan ölkəsinin terror təşkilatlarına qarşı mübarizəni davam etdirmək əzmində olduğunu bildirib.
AZƏRTAC xəbər verir ki, Türkiyə xarici işlər naziri çərşənbə axşamı Ankarada latviyalı həmkarı Bayba Bayje ilə birgə brifinqdə bəyanatla çıxış edib.
Fidanın sözlərinə görə, terrorla mübarizənin vacib komponenti beynəlxalq əməkdaşlıqdır. “Biz Latviyadan qanlı “Paralel dövlət” təşkilatına (FETÖ) qarşı mübarizə də daxil olmaqla, fəal dəstək və konkret addımlar gözləyirik”, - deyə türkiyəli nazir bildirib.
Türkiyənin xarici işlər naziri Ankaranın NATO müttəfiqləri, o cümlədən Latviya ilə birgə müdafiə layihələri həyata keçirməyə hazır olduğunu da qeyd edib.
Ukraynadakı vəziyyətə gəlincə, Türkiyə diplomatiyasının rəhbəri deyib ki, bu mövzu Bayje ilə bugünkü görüşdə qaldırılıb. “Türkiyə Ukraynanın ərazi bütövlüyünü və suverenliyini tanıyır. Bu mövqe dəyişməzdir. Biz bu ölkədə sülhə yönəlmiş istənilən təşəbbüsü dəstəkləyirik”, - deyən nazir müharibənin tezliklə başa çatacağına ümid etdiyini bildirib.
Ramin Abdullayev
AZƏRTAC-ın xüsusi müxbiri
Ankara
Bölmənin digər xəbərləri
