TÜRKSOY-un Baş katibi Bakıda keçirilən tarixi Türkoloji Qurultayın əhəmiyyətindən danışıb
Bakı, 28 fevral, AZƏRTAC
1926-cı ildə Bakıda keçirilən Birinci Türkoloji Qurultay təkcə elmi müzakirələr platformasına deyil, həm də xalqların taleyinin əks olunduğu məkana çevrildi. Tarixi forumun iştirakçıları dilçiliyin qarşısında duran vəzifələrin müzakirəsi ilə yanaşı, həmvətənlərinin səsini ucaltmış, milli kimlik ideyasının formalaşmasına töhfə verməyə, cəmiyyətlərin gələcəyinə vahid yanaşmalar formalaşdırmağa çalışmışlar.
AZƏRTAC xəbər verir ki, bunu Beynəlxalq Türk Mədəniyyəti Təşkilatının (TÜRKSOY) baş katibi Sultan Rayev Ankaradakı universitetlərdən birində Stalin repressiyalarının qurbanı olmuş türkşünasların xatirəsinə həsr olunmuş konfransın iştirakçıları qarşısında çıxışı zamanı deyib.
O xatırladıb ki, 99 il əvvəl Bakıda aktuallığını davam etdirən ortaq əlifba və türk kimliyi üçün vahid təməl mövzuları müzakirə olunub.
“Türk dünyası tarix boyu problem və sınaqlarla üzləşib, lakin dil, mədəniyyət və kimliyə münasibətini heç vaxt dəyişməyib. Min il tarixi olan türk irsinin əksini bu gün Orta Asiyadan Balkan yarımadasına qədər geniş bir ərazidə görmək olar”, - deyən TÜRKSOY-un Baş katibi türk xalqlarının əsrlərboyu təkcə döyüş meydanında deyil, həm də elm və təhsil sahəsində çətinliklərlə üzləşdiyini vurğulayıb.
S.Rayev diqqəti Stalin repressiyaları dövrünün pik nöqtəsinə - 1937-1938-ci illərin hadisələri ilə yanaşı, türk ziyalılarının görkəmli nümayəndələrinin də təqiblərə məruz qalmasına yönəldib. “Repressiyalar fərdləri yox, xalqların ümumi özünüdərkini məhv etmək məqsədi güdürdü. Türkoloqları, şairləri, alimləri, yazıçıları susdurmağa cəhdlər edilirdi. Lakin onların susdurmağa çalışdıqları səs bu gün də ucalır, xalqlarımızı bir-birinə daha da yaxınlaşdırır, birləşdirir”, - deyən Baş katib türk xalqları arasında əməkdaşlığın dərinləşdirilməsi istiqamətində gələcək addımların vacibliyini vurğulayıb.
TÜRKSOY-un Baş katibi gənc vətəndaş nəslinə Türk dünyasının mədəni və elmi irsi haqqında hərtərəfli biliklərin aşılanmasının vacibliyini vurğulayıb. “Dil, tarix və mədəniyyət vahid irsin bir hissəsidir, ondan başlayaraq biz gələcəyə inamla addımlaya bilərik”, - deyə S.Rayev bildirib.
Ramin Abdullayev
AZƏRTAC-ın xüsusi müxbiri
Ankara
Bölmənin digər xəbərləri
