TÜRYANÇAY DÖVLƏT TƏBİƏT QORUĞUNDA YANĞIN OLMUŞDUR
AZƏRTAC xəbər verir ki, sentyabrın 22-də saat 18:25 radələrində Türyançay Dövlət Təbiət Qoruğunun Ağdaş rayonu ərazisində yerləşən hissəsində yanğın baş vermişdir.
Böyük Qafqaz sıra dağlarının təqribən 1200 metrlik yüksəkliyində yerləşən XVIII əsrin tarixi-memarlıq abidəsi “Surxay Qalası”nın ərazisində baş verən yanğının söndürülməsinə Fövqəladə Hallar Nazirliyinin Göyçay və Ağdaş Dövlət Yanğından Mühafizə hissələrinin əməkdaşları və qoruğun işçiləri cəlb olunmuşlar.
Yanğınsöndürənlər hadisə yerinə getmək üçün 6 kilometr avtomaşınla, 10 kilometr piyada hərəkət etməli olmuş və bir saat ərzində “Surxay Qalası”na çatmışlar. Geniş ərazini əhatə edən yanğını yalnız gecə saat 23:00-da söndürmək mümkün olmuşdur.
Göyçay Dövlət Yanğından Mühafizə Hissəsinin rəisi, mayor Şahin Cəfərov bildirmişdir ki, kəskin hava şəraiti, keçilməz yollar, yüksək dağlıq ərazi və qaranlıq düşməsi yanğının tez söndürülməsinə imkan verməmişdir. Yanğının söndürülməsi üçün 3 avtomaşın ayrılsa da, onların dağ yüksəkliyinə qalxması mümkün olmamışdır. Ümumilikdə 0,5 ərazini əhatə edən yanğın əl əməyi ilə söndürülmüş və qoruğun 5 min hektar sahəsi mühafizə olunmuşdur. Ərazidə əsasən meşə ağacları və kollar yanmışdır.
Yanğının başvermə səbəbləri araşdırılır.
Bölmənin digər xəbərləri
