REGİONLAR
Tütün əkib-becərən zəhmətkeş qadınlar FOTO VİDEO
İsmayıllı, 23 avqust, Rəşad Türkoğlu, AZƏRTAC
İsmayıllı rayonunun Qurbanəfəndi kəndinin sakinləri ənənəvi gəlir sahəsi olan tütünçülükdən bir neçə il uzaq düşsələr də, yenidən bu əkin növünə üstünlük veriblər. Belə sakinlərdən biri də 65 yaşlı Firuzə Qurbanovadır. O, ömrünün yarıdan çoxunu tütünçülüyə həsr edib.
Firuzə nənə AZƏRTAC-ın bölgə müxbiri ilə söhbətində bildirib ki, gəlir mənbəyinə görə tütünçülük digər əkin növlərindən geri qalmır: “Biz keçmişdə tütün əkirdik, tonlarla məhsul təhvil verirdik. Bir neçə il bu işə fasilə verdik, əkmədik, amma indi yenidən bu gəlirli sahəyə qayıtmışıq. Bol məhsulumuz var”.
Kəndin digər sakini Siyatel Sərdarova da bu işlə məşğuldur. Deyir ki, aprel ayında sahələrdə şum işləri aparılır, may ayında isə tütün şitilləri əkilir. Sonra isə aqrotexniki qulluğa önəm verilir.
Fermerlər sahələrdə əkib-becərdikləri tütün yarpaqlarını avqust ayında yığmağa başlayırlar və yığım payız aylarına qədər davam edir. Sahədən yığılan tütün yarpaqları həyətlərə daşınır, qurudulması üçün təyin edilən yerlərə yığılır.
Rayonun Topçu kənd sakini olan Alizə Əhmədova da tütünçülüklə məşğuldur. “Tütün yarpaqlarını bir-bir şişdən keçirərək ipə düzürük, daha sonra qurumasını gözləyirik. Hava günəşli olarsa 4-5, yağışlı olarsa 10 günə quruyur. Sonra qurumuş yarpaqları yeşiklərə qablaşdırıb, emal zavoduna təhvil veririk”, - deyə o bildirib.
İsmayıllı Rayon İcra Hakimiyyətindən verilən məlumata görə, bu il ayrı-ayrı kəndlərdə, ümumilikdə, 30 hektar sahədə tütün əkilib. Tütünün təhvil verilməsində rayonun Qalınçaq və İvanovka kəndləri öndə gedirlər.
Kənd Təsərrüfatı Nazirliyinin İctimaiyyətlə əlaqələr və informasiya təminatı şöbəsinin müdiri Vüqar Hüseynovun sözlərinə görə, bu il Naxçıvan Muxtar Respublikası da daxil olmaqla, 12 rayonda 3244 hektar ərazidə tütün əkilib. Bu günə qədər 2775 ton məhsul yığılıb. Onun da 526 tonu artıq təhvil verilib. Aqrar Subsidiya Şurasının qərarına əsasən, dövlət tərəfindən tütünün hər bir tonuna 50 manat subsidiya verilir. Bu, fermerlərin bu sahəyə marağının artmasında böyük rol oynayır.
Xatırladaq ki, ölkə ərazisində tütünçülüklə əsas məşğul olan rayonlar Şəki və Qax olsa da, digər rayonlarda da bu əkin növünə maraq artmaqdadır.