UCARLI FERMERLƏR HEYVANDARLIQ SAHƏSİNDƏ UĞURLU NƏTİCƏLƏR QAZANIRLAR
Ucar, 2 dekabr (AZƏRTAC). Ucar rayonunda iqtisadiyyatın aparıcı sahələrindən olan heyvandarlıq intensiv sürətlə inkişaf edir.
Rayon icra hakimiyyətindən bildirmişlər ki, hazırda bu sahə üzrə 30 fermer təsərrüfatı fəaliyyət göstərir. Rayonda qaramalın baş sayı 52 min 450 başa, davarların sayı isə 106 min 90 başa çatmışdır.
Cari ilin on bir ayında rayon üzrə diri çəkidə ət istehsalı ötən ilin müvafiq dövrünə nisbətən 16,2 ton artaraq 2.491 tona, süd istehsalı isə 195 ton çoxalaraq 16 min 127 tona çatmışdır. Müqayisə olunan dövrdə yun istehsalı 2,4 ton, yumurta istehsalı isə 840 min ədəd artmışdır. On bir ayda yun istehsalı 157,8 ton, yumurta isə 5 milyon 840 min ədəd təşkil etmişdir.
Heyvandarlıqla məşğul olan fermerlər, eləcə də fiziki şəxslər artıq mal-qaranın cins tərkibinin dəyişdirilməsinə, daha məhsuldar heyvanlar yetişdirilməsinə ciddi maraq göstərirlər. Bu sahədə son illər böyük uğurlar qazanılmışdır. Təkcə süni mayalandırma üsulu ilə bu ilin ötən dövründə 158 cins buzov alınmışdır.
Bölmənin digər xəbərləri
