ÜÇ BOKSÇUMUZ DÜNYA ÇEMPİONATININ ƏN AZI BÜRÜNC MEDALINA NAMİZƏDDİR

19.11.2005 [15:03]
Çap et
A⁺ A^-

AZƏRTAC xəbər verir ki, Çinin Mianyanq şəhərində dünya boks çempionatı davam edir. Ölkəmizi yarışlarda baş məşqçi Məmməd Eyvazovun rəhbərliyi ilə 11 idmançıdan ibarət yığma komanda təmsil edir.

Noyabrın 18-də keçirilən dörddə bir final yarışlarında mübarizə aparmaq hüququ qazanmış 3 boksçumuz – Romal Amanov (60 kq) polşalı Krizstof Szota 30:17, Emil Məhərrəmov (64 kq) braziliyalı Mayk Korvalyoya 28:19, Elçin Əlizadə (91 kq) isə Qırğızıstan idmançısı Ruslan Mursatayevə 29:16 hesabı ilə qalib gələrək yarımfinala vəsiqə qazanmaqla yanaşı, dünya çempionatının ən azı bürünc medalını almağa namizəddirlər.

Bu mərhələdə Cavid Tağıyev misirli Məhəmməd Hikala uduzaraq (34:20) yarışlarda çıxışını başa vurmuşdur.

Yarımfinal qarşılaşmaları noyabrın 19-da keçiriləcəkdir.