Ukrayna gələn qış mövsümü üçün qaz tədarükünə 1 milyard avro axtarır
Kiyev, 21 aprel, AZƏRTAC
Ukraynanın “Naftoqaz” Milli Səhmdar Cəmiyyəti (MSC) gələn qışa hazırlıq üzərində iş aparır. Hazırda bu şirkətə qaz tədarük etmək üçün çoxlu maliyyə vəsaiti lazımdır.
AZƏRTAC bu barədə “Naftoqaz”ın mətbuat xidmətinə istinadla məlumat verir.
Şirkətin rəhbəri vəzifəsini icra edən Roman Çumakın sözlərinə görə, “Naftoqaz” Ukrayna hökuməti və beynəlxalq maliyyə institutları ilə 2 milyard kubmetrdən çox qazın tədarükü üçün 1 milyard avro məbləğində maliyyə cəlb etmək üçün danışıqlar aparır.
O bildirib ki, rəhbərlik etdiyi şirkət birinci rüb ərzində AYİB və Norveçdən təxminən 430 milyon avro cəlb edə bilib ki, bu da yaxın vaxtlarda 1 milyard kubmetr həcmində idxal olunan təbii qazın alınmasına sərf olunacaq. Çumak əlavə edib: “İlin əvvəlindən 1,5 milyard kubmetr qaz üçün müqavilə bağlanılıb, bu həcmin 800 milyon kubmetri həmin vaxt təcili olaraq idxal edilib, 400 milyon kubmetr isə gələn qışa hazırlıq üçün Ukraynaya təhvil veriləcək. “Naftoqaz” daha 300 milyon kubmetr qazı isə ORLEN şirkətindən alıb.
R.Çumak qeyd edib ki, növbəti qışa hazırlıq asan olmayacaq; hökumətin bütün strukturlarından komanda işi və beynəlxalq tərəfdaşların cəlb edilməsi tələb olunacaq. O sözlərini yekunlaşdırıb: “Ötən istilik mövsümündə “Naftoqaz” qrupu mümkün olmayanı da etdi - bütün çətinliklərə rəğmən istilik mövsümünü qoruyub saxladı. Gələn qış mövsümündə isə bundan daha çox iş görməliyik”.
Bölmənin digər xəbərləri
