Ukrayna hərbçilərinin təlim ərazisi raketlə vurulub, azı 12 hərbçi həlak olub
Kiyev, 1 iyun, AZƏRTAC
Ukrayna Silahlı Qüvvələrinin Quru Qoşunlarının təlim bölməsinin yerləşdiyi yerə raket zərbəsi endirilib, 12 nəfər ölüb, 60-dan çoxu yaralanıb.
AZƏRTAC xəbər verir ki, bu barədə “suspilne.media” Ukrayna Quru Qoşunlarına istinadla məlumat yayıb.
“İyunun 1-də düşmən Ukrayna Silahlı Qüvvələrinin Quru Qoşunlarının təlim bölmələrindən birinin yerləşdiyi yerə raket zərbəsi endirib. Təəssüf ki, ölən və yaralanan hərbçilər var”, - deyə məlumatda bildirilir.
Hərbçilər qeyd edirlər ki, heç bir birləşmə və ya şəxsi heyətin kütləvi toplantısı keçirilməyib.
"Hava hücumu həyəcanı elan edildikdən sonra şəxsi heyətin əksəriyyəti sığınacaqlarda olub. Zərərçəkənlərə bütün lazımi ixtisaslı tibbi yardım göstərilir", - deyə Quru Qoşunları əlavə edib.
Şəxsi itkilərin bütün hallarını və səbəblərini aydınlaşdırmaq üçün Ukrayna Silahlı Qüvvələrinin Quru Qoşunlarının komandanlığında komissiya yaradılıb və xidməti araşdırmaya göstəriş verilib.
Ukrayna Silahlı Qüvvələrinin Quru Qoşunlarının sözçüsü Vitali Sarantsevin sözlərinə görə, ilkin olaraq zərbənin “İskəndər”lə həyata keçirildiyi məlumdur, lakin yekun nəticə zərbə yeri ekspertlər tərəfindən yoxlanıldıqdan sonra məlum olacaq.
"Hava hücumu ilə bağlı həyəcan siqnalı elan edilən zaman onlara çata bilməyənlər istisna olmaqla, bütün şəxsi heyət sığınacaqlarda idi", - deyə V.Sarantsev qeyd edib.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
