UKRAYNAYA MƏXSUS MÜLKİ YÜK TƏYYARƏSİ QƏZAYA UĞRAMIŞDIR
“Azərbaycan Hava Yolları” Dövlət Konsernin Baş direktoru Cahangir Əsgərov AZƏRTAC-ın müxbirinə demişdir ki, Ankara-Bakı-Kabul reysi ilə uçan təyyarə yanacaq doldurmaq üçün Binə hava limanına enmişdi. Təyyarə yanacaq doldurub havaya qalxarkən 50-60 metr hündürlükdən hava limanından 3-4 kilometr aralıda yerə düşmüşdür. Heyətin 8 üzvündən 3 nəfəri həlak olmuş, 5-i isə müxtəlif dərəcəli bədən xəsarəti almışdır. Həlak olanlardan biri şturmandır. Yaralılar xəstəxanaya çatdırılmışdır.
Baş direktorun sözlərinə görə, qəzadan dərhal sonra Binə hava limanının qəza-xilasetmə xidmətinin işçiləri hadisə yerinə gəlmişlər. Hadisənin səbəblərini araşdırmaq üçün komissiya yaradılmışdır. Qara qutu Ukrayna mütəxəssisləri ilə birlikdə açılacaqdır.
