Ümummilli Lider Heydər Əliyev və akademik Zərifə Əliyevanın 103-cü ildönümü qeyd olunub
Bakı, 6 may, AZƏRTAC
AMEA-nın Folklor İnstitutu və Yeni Azərbaycan Partiyası (YAP) Yasamal rayon təşkilatının birgə təşkilatçılığı ilə Ümummilli Lider Heydər Əliyevin və akademik Zərifə Əliyevanın anadan olmasının 103-cü ildönümünə həsr edilmiş tədbir keçirilib.
İnstitutdan AZƏRTAC-a bildirilib ki, tədbir Azərbaycan Respublikasının Dövlət Himninin səsləndirilməsi ilə başlayıb, Ulu Öndər Heydər Əliyev və akademik Zərifə Əliyevanın əziz xatirəsi bir dəqiqəlik sükutla yad edilib. Daha sonra Folklor studiyası tərəfindən hazırlanmış videoçarxa baxış olub.
Folklor İnstitutunun direktoru filologiya elmləri doktoru Hikmət Quliyev çıxışında Ulu Öndər Heydər Əliyevin müasir Azərbaycan dövlətçiliyinin formalaşması və möhkəmlənməsindəki müstəsna rolunu qeyd edib, onun milli-mənəvi dəyərlərin qorunması və inkişafı istiqamətində həyata keçirdiyi siyasətin bu gün də aktuallığını qoruduğunu vurğulayıb. Hikmət Quliyev bildirib ki, Ulu Öndərin zəngin siyasi irsi və uzaqgörən fəaliyyəti nəticəsində Azərbaycan müasir inkişaf mərhələsinə qədəm qoyub, elm, təhsil və mədəniyyət sahələrində mühüm nailiyyətlər əldə olunub. “Biz böyük fəxr və qürur hissi ilə deyə bilərik ki, məhz Ulu Öndərin təşəbbüsü və ideya rəhbərliyi sayəsində Azərbaycanda milli-mənəvi dəyərlərin qorunduğu və öyrənildiyi bir elmi mərkəz – Folklor İnstitutu yaranıb. Türk dünyasının ana abidəsi olan “Kitabi-Dədə Qorqud” dastanının 1300 illik yubileyinin keçirilməsi, dastanlarımızın yenidən, müstəqillik düşüncəsi və kimliyi rakursundan araşdırılması, nəticə etibarilə folklorumuzu, xalq yaddaşı və dəyərlərini öyrənən bir qurumun meydana gəlməsinə rəvac verdi. Bu, məhz Ulu Öndərin ideyası və həyata keçirdiyi siyasətin nəticəsi idi”, - deyə alim vurğulayıb.
Hikmət Quliyev çıxışı zamanı akademik Zərifə Əliyevanın Azərbaycan tibb elminin inkişafındakı müstəsna xidmətlərini xüsusi vurğulayıb. Qeyd edib ki, o, yalnız görkəmli oftalmoloq-alim kimi deyil, həm də yüksək mənəvi keyfiyyətləri ilə seçilən ziyalı, qayğıkeş ana və sədaqətli həyat yoldaşı olaraq Azərbaycan cəmiyyətində dərin iz qoyub.
YAP Yasamal rayon təşkilatının sədri tarix üzrə fəlsəfə doktoru Bəxtiyar Nəbiyev Ümummilli Lider Heydər Əliyevin həm sovet dövründə, həm də müstəqillik illərində Azərbaycan dövlətinin çiçəklənməsində, milli-mənəvi dəyərlərin qorunmasındakı xüsusi xidmətləri barədə danışıb. O, Heydər Əliyevin milli-mənəvi dəyərlərin qorunması istiqamətində həyata keçirdiyi siyasəti də xüsusi qeyd edib, 1978-ci il Konstitusiyasında Azərbaycan dilinin dövlət dili kimi təsbit olunmasının mühüm tarixi hadisə olduğunu vurğulayıb. Bildirib ki, onun rəhbərliyi ilə kənd təsərrüfatı, sənaye və təhsil sahələrində genişmiqyaslı layihələr reallaşdırılıb, hərbi təhsil sisteminin formalaşdırılması istiqamətində mühüm addımlar atılıb.
AMEA Mərkəzi Elmi Kitabxanasının direktoru texnika elmləri doktoru Hüseyn Hüseynov Ulu Öndər Heydər Əliyevin zəngin həyat və fəaliyyətindən bəhs edərək onun xüsusilə təhsil sahəsinə göstərdiyi diqqət və qayğını qeyd edib, gənclərin xaricdə təhsil imkanlarının genişləndirilməsinin bu uzaqgörən siyasətin bariz nümunəsi olduğunu bildirib. Alim çıxışında Ulu Öndərin kitabxana və nəşriyyat sahəsinə verdiyi töhfələrə də toxunub, ölkədə kitabxana sisteminin qorunub saxlanılması və inkişaf etdirilməsi istiqamətində mühüm qərarların qəbul edildiyini qeyd edib.
AMEA Azad Həmkarlar İttifaqının sədri sosial elmlər üzrə fəlsəfə doktoru Sənan Həsənov nitqində Ulu Öndərin irsinə sədaqətin milli inkişafın əsas istiqamətlərindən biri olduğunu vurğulayıb. O, Ulu Öndər Heydər Əliyevin formalaşdırdığı siyasi kursun uzaqgörən və praktik mahiyyət daşıdığını qeyd edib, bu kursun nəzəri biliklərlə yanaşı, real həyatda tətbiq olunan strateji addımlarla zənginləşdirildiyini bildirib.
Tədbirdə məruzələrlə çıxış edən Azərbaycan Dillər Universitetinin müəllimi İradə Sərdarova, Folklor İnstitutunun əməkdaşları İlhamə Qəsəbova və Sevinc Əliyeva Ulu Öndərin milli kimlik, mədəniyyət və folklor siyasətindəki rolunu diqqətə çatdırıblar.
Daha sonra Yeni Azərbaycan Partiyasına yeni üzv qəbul edilmiş şəxslərə üzvlük vəsiqələri təqdim edilib.
Bölmənin digər xəbərləri
