UNEC-də müzakirə: Vətən müharibəsinin əhalinin həyat məmnuniyyətinə gözlənilən təsirləri
Bakı, 6 noyabr, AZƏRTAC
Noyabrın 6-da Azərbaycan Dövlət İqtisad Universitetində (UNEC) “Vətən müharibəsinin əhalinin həyat məmnuniyyətinə gözlənilən təsirləri” mövzusunda onlayn müzakirələr aparılıb və tədqiqatların nəticələri açıqlanıb.
AZƏRTAC xəbər verir ki, UNEC-in rektoru, professor Ədalət Muradov sentyabrın 27-dən başlayaraq Ermənistan silahlı qüvvələrinin Azərbaycana qarşı növbəti hərbi təcavüzünə cavab olaraq şanlı ordumuzun uğurlu əks-hücum əməliyyatı keçirdiyini diqqətə çatdırıb. Rektor 30 ildir işğal altında olan ərazilərimizin böyük hissəsinin Azərbaycan Prezidenti, Müzəffər Ali Baş Komandan İlham Əliyevin rəhbərliyi ilə ordumuz tərəfindən azad edildiyini bildirib. Vətən müharibəsinin başladığı andan UNEC-in bu savaşa dəstək və töhfələr vermək məqsədilə çıxış etdiyini vurğulayan rektor, universitetin İqtisadi Araşdırmalar Elmi-Tədqiqat İnstitutu tərəfindən bu istiqamətdə 5 seminar keçirildiyini deyib. Azərbaycan və Ermənistan iqtisadiyyatının müqayisəli təhlilinə həsr olunan seminarların nəticələrinə görə, Azərbaycan iqtisadiyyatının güclü, Ermənistan iqtisadiyyatının isə zəif olduğunun bir daha təsdiqləndiyini qeyd edib. Azərbaycanla müharibə aparmaq üçün Ermənistanın resurslarının artıq tükəndiyini, Azərbaycanın isə torpaqlarını işğaldan azad etməsi üçün yetərincə gücü olduğunu diqqətə çatdırıb.
UNEC-də 30-dan artıq tədqiqat mərkəzinin fəaliyyət göstərdiyini deyən rektor, onlar tərəfindən Vətən müharibəsinin təsirləri ilə bağlı müxtəlif istiqamətlərdə tədqiqatlar aparıldığını və əldə olunan nəticələrin müzakirəsi barədə silsilə tədbirlərə start verildiyini bildirib.
Professor Ədalət Muradov ölkəmizdə və xaricdə yaşayan azərbaycanlı iqtisadçı alimləri həmin tədqiqatlara qoşulmağa dəvət edib, birgə səylər nəticəsində qələbə gününün daha da yaxınlaşmasına töhfələr verilə biləcəyini vurğulayıb.
Tədbirin moderatoru, UNEC rektorunun müşaviri, dosent Elşən Bağırzadə mövzunun aktuallığına diqqət çəkərək, əhalinin məmnunluq səviyyəsinin, xoşbəxtlik iqtisadiyyatı adlandırılan bu sahənin ölkədə çox az tədqiq edildiyini və iqtisad elmində yeni olduğunu bildirib. Ciddi araşdırmalar tələb edən həmin sahənin dünyada geniş inkişaf etdiyini və bu istiqamətdə aparılan tədqiqatların Azərbaycan üçün faydalı olacağını bildirib.
Sonra UNEC Empirik Tədqiqatlar Mərkəzinin rəhbəri Xətai Alıyev mövzuya dair təqdimatla çıxış edib. Məruzəçi Vətən müharibəsinin, Qarabağın azad olunması aspektində əhalinin həyat məmnunluğu səviyyəsinə təsir göstərən qeyri-maddi və maddi faktorlarını açıqlayıb. O, Vətən müharibəsində qazanılacaq zəfərin ölkə əhalisinin həyat məmnuniyyətinə əhəmiyyətli dərəcədə müsbət təsir göstərəcəyini, post-müharibə dövründə xalq-dövlət birliyində strateji kommunikasiyanın doğru qurulmasının bu təsiri daha da möhkəmləndirəcəyini bildirib. Müharibə yekunlaşdıqdan sonra həyat məmnunluğuna və digər sosial göstəricilərə təsirin sorğu əsasında qiymətləndirilməsinin aparılacağını da diqqətə çatdırıb.
Tədbirdə çıxış edən professor Akif Musayev torpaqların işğal olunmasının ölkəyə iqtisadi və sosial təsirlərindən danışıb. O, dövlət tərəfindən bu sahədə yaranan problemlərin həlli istiqamətində məqsədyönlü kompleks tədbirlər həyata keçirildiyini bildirib. Professor A.Musayev Vətən müharibəsindən sonra azad olunan ərazilərimizin ölkənin iqtisadi inkişafı üçün mühüm mənbələr kimi çıxış edəcəyini deyib.
ABŞ-ın Texas A&M Universitetinin müəllimi Samir Hüseynov əhalinin məmnuniyyətində psixoloji amillərin rolundan danışıb. Müharibədən sonra milli kimliyin formalaşmasının, ədalətin bərpasının sosial və iqtisadi münasibətlərə gözlənilən müsbət təsirlərini açıqlayıb.
Atatürk Universitetinin professoru Kərəm Karabulut Türkiyənin hər zaman qardaş ölkənin yanında olduğunu, bu qardaşlığın əbədi və sarsılmazlığını iştirakçıların diqqətinə çatdırıb. Əslən Xankəndidən olan türkiyəli alim işğal altında olan Azərbaycan torpaqlarının tezliklə azad olunacağından əminliyini ifadə edərək, həmin ərazilərin iqtisadi inkişaf potensialından danışıb. Bildirib ki, sahib olduğu təbii ehtiyatların miqdarına və keyfiyyətinə görə Qarabağın ölkənin iqtisadi inkişafında əhəmiyyətli payı var. Alim öz hesablamasına görə, Qarabağın Azərbaycanın ÜDM-ni illik 10 milyard ABŞ dolları həcmində artırma potensialına malik olduğu bildirib. Ermənistanın Qarabağda törətdiyi təxribatla Azərbaycana vurduğu zərərin məbləğinin isə təxminən 300-400 milyard dollar dəyərində hesablandığını deyib. Alim işğaldan azad olunacaq ərazilərin bərpasının və iqtisadi inkişafının hər iki ölkəyə qazandıracağı töhfələrdən danışıb, Azərbaycanın regionda iqtisadi gücünün əhəmiyyətli dərəcədə artacağını bildirib.
Müzakirələrdə UNEC-in professor-müəllim heyəti, tədqiqat mərkəzlərinin əməkdaşları, ölkənin tanınmış iqtisadçıları, habelə ABŞ və Türkiyə universitetlərinin alimləri iştirak ediblər.
Sonda iştirakçılar aparılan müzakirələrin və tədqiqatların nəticəsinin cəmiyyət üçün faydalı olduğunu, belə araşdırmaların davam etdirilməsinin vacibliyini bildiriblər.
Tədbirin sonunda iştirakçıların sualları cavablandırılıb.
Bölmənin digər xəbərləri
