Ursula Fon der Lyayen: Bizim bildiyimiz Qərb artıq mövcud deyil
Bakı, 16 aprel, AZƏRTAC
Avropa İttifaqı (Aİ) Komissiyasının rəhbəri Ursula Fon der Lyayen bildirib ki, ABŞ Prezidenti Donald Trampın siyasəti tarixi dəyişikliklər gətirir və Aİ-ni bu yeni dünya nizamının formalaşmasında çox fəal rol oynamağa məcbur edir.
AZƏRTAC xarici mediaya istinadla xəbər verir ki, “Bizim bildiyimiz Qərb artıq mövcud deyil”, -deyən Fon der Lyayen Almaniyanın "Die Zeit" qəzetinə müsahibəsində deyib: “Mən inanmış Atlantik tərəfdarı və Birləşmiş Ştatların böyük dostu olsam da, ABŞ administrasiyası ilə Avropa arasında mövcud böhranın daha geniş geosiyasi çağırışlarla birlikdə Aİ-ni müvafiq addımlar atmağa məcbur etdiyini düşünürəm”.
Aİ Komissiyasının Prezidenti əlavə edib: “Dünya nizamı kimi qəbul etdiyimiz struktur nəinki Çin ilə ABŞ arasındakı hegemonluq mübarizəsi, həm də, əlbəttə ki, Putinin imperialist ambisiyaları ilə gərginləşən dünya nizamsızlığına çevrilir. Buna görə də bizə böyük dünyaya çıxmağa hazır olan və qarşıdan gələn bu yeni qlobal nizamın formalaşmasında çox fəal rol oynayan başqa, yeni Aİ lazımdır”.
Fon der Lyayen ABŞ Prezidenti Donald Trampın ekspansiv ticarət siyasətindən sonra Avropa İttifaqının 27 üzvlü blokunun proqnozlaşdırılan kursu və etibarlılığı sayəsində gücünü qoruyub saxladığını və digər xalqların Aİ-yə marağının artdığını iddia edib. Kanada, Hindistan, Malayziya, İndoneziya, Meksika və Cənubi Amerikanı misal gətirən Aİ Komissiyasının rəhbəri əlavə edib: “Müsbət yan təsir odur ki, hazırda yeni nizam üzərində bizimlə birlikdə işləmək istəyən bütün dünyada dövlət və hökumət başçıları ilə saysız-hesabsız danışıqlar aparıram”.
Aİ Komissiyasının Prezidenti vurğulayıb ki, ABŞ ilə ticarət qlobal ticarətin 13 faizini təşkil edir və bu, mühüm rəqəmdir, qalan 87 faiz isə digər ölkələrin payına düşür.
“Hər kəs Avropa ilə daha çox ticarətin olmasını istəyir və bu, təkcə iqtisadi əlaqələrə aid deyil. Bu, həm də ümumi qaydaların yaradılması və proqnozlaşdırıla bilməsidir. Avropa davamlı siyasi kursu, habelə etibarlılığı ilə tanınır və bu amil yenidən çox dəyərli bir cəhət kimi görünməyə başlayır”, -deyə Fon der Lyayen sözlərini yekunlaşdırıb.
Bölmənin digər xəbərləri
