ÜST əfqan qadınların zəlzələdən sonra humanitar fəaliyyətdə iştirakı üçün Talibana müraciət edib
Bakı, 8 sentyabr, AZƏRTAC
Ümumdünya Səhiyyə Təşkilatı (ÜST) Talibandan Əfqanıstanın şərqində azı 2200 nəfərin ölümünə səbəb olan güclü zəlzələdən sonra əfqan qadınların humanitar yardım işlərində kişilərin müşayiəti olmadan iştirak etməsinə icazə verilməsini və səhiyyə xidmətlərindən istifadədə çətinlik çəkən zərif cinsin nümayəndələrinə köməklik göstərmək üçün məhdudiyyətləri aradan qaldırmağı xahiş edib.
AZƏRTAC xəbər verir ki, ÜST-nin Əfqanıstandakı nümayəndəliyinin müavini doktor Mukta Şarmanın sözlərinə görə, hazırda bu yerlərdə artan qadın kadr çatışmazlığı çox böyük problemə çevrilir.
Hesablamalara görə, Əfqanıstanda tibb işçilərinin təxminən 90%-i kişilər, qalan 10%-i isə ağır yaraları müalicə edə bilən qadın həkimlər deyil, mama və tibb bacılarıdır. “Reuters” yazır ki, bu, tibbi yardım göstərməyi çətinləşdirir, çünki qadınlar özlərini narahat hiss edirlər və ya kişilərlə ünsiyyət qurmaqdan, habelə müalicə yerinə tək getməkdən qorxurlar.
Əfqanıstan Səhiyyə Nazirliyi və Taliban sözçüsü bu müraciəti şərh etmək tələblərinə dərhal cavab verməyib.
2022-ci ildə Əfqanıstan hökuməti qadın QHT işçilərinə evlərindən kənarda işləməyi dayandırmağı əmr edib. Yardım rəsmiləri, xüsusən də səhiyyə və təhsil sektorlarında istisnaların olduğunu söyləyirlər, lakin bir çoxları bunun nadir hallarda yerinə yetirildiyini və xüsusilə səyahət tələb edən fövqəladə hallarda qadın işçilərin sayını kəskin şəkildə artırmaq üçün qeyri-kafi olduğunu bildirir.
ÜST-nin Əfqanıstandakı sözçüsü ölkədə qadın həkim çatışmazlığının getdikcə artdığını qeyd edib, çünki Taliban qız tələbələrin orta məktəb və universitetlərə daxil olmasını qadağan edib, yəni qadın həkimlərdən ibarət kadr bazası yoxdur.
BMT-nin hesablamalarına görə, zəlzələdən təxminən 11600 hamilə qadın zərər çəkib. Əfqanıstan Asiyada ən yüksək ana ölümü nisbətinə malikdir.
Bölmənin digər xəbərləri
