Vaşinqtonda Azərbaycan mədəniyyətinə həsr olunun tədbir böyük uğurla keçib VİDEO
Noyabrın 12-də Vaşinqtonun mərkəzində yerləşən Endrü Mellon adına möhtəşəm konsert salonunda Azərbaycan mədəniyyətinə və ənənələrinə həsr edilmiş “Azərbaycan gözəllikləri bayramı” adlı qala-gecə olub. Bu il Azərbaycan Respublikasının Konstitusiya Günü keçirilən Azərbaycan mədəniyyətinin ənənəvi təqdimatı gecəsi Azərbaycan-Amerika Alyansı tərəfindən təşkil olunub.
Qonaqlara Azərbaycan-Amerika Alyansı və onun ABŞ-da fəaliyyəti barədə məlumat verilib. Alyansın təsisçisi və prezidenti Anar Məmmədov qonaqları salamlayaraq, Birləşmiş Ştatlar ilə Azərbaycan arasında sıx dostluq münasibətlərindən söz açıb. Bildirib ki, Azərbaycan ABŞ-ın dostu və müttəfiqidir. Azərbaycan-Amerika Alyansı bu ölkədə fəaliyyət göstərən qeyri-kommersiya təşkilatı kimi Azərbaycanın tarixi, incəsənəti, mədəniyyəti və ənənələri barədə Amerika ictimaiyyətini məlumatlandırmaqla, ölkələrimiz arasında münasibətlərin təkcə hökumət səviyyəsində möhkəmlənməsini deyil, həm də Amerika və Azərbaycan xalqları arasında əlaqələrin inkişafını təmin edir.
Sonra Azərbaycan Respublikasının ABŞ-dakı səfiri Elin Süleymanov çıxış edərək, Vaşinqtonda Azərbaycan mədəniyyətinin bayramına toplaşan qonaqlara təşəkkür edib. O bildirib ki, Azərbaycan bir çox sahələrdə ABŞ ilə əməkdaşlıq edən etibarlı tərəfdaşdır. Diplomat vurğulayıb ki, müstəqilliyi bərpa olunduğu gündən uzun yol qət edən Azərbaycan iqtisadiyyatının sabit inkişafını təmin edib, özünü beynəlxalq siyasət meydanında müstəqil ölkə kimi təsdiqləyib. Müstəqilliyin qorunub saxlanılması və dünya ölkələri ilə dost münasibətlərin inkişaf etdirilməsi Prezident İlham Əliyev administrasiyası üçün prioritetdir və Azərbaycan xalqının iradəsini əks etdirir.
Səfir bildirib ki, Azərbaycan etibarlı tərəfdaş və dost kimi çətin günlərində həmişə ABŞ-ın yanında olub. O ümidvar olduğunu bildirib ki, ABŞ da, xüsusən, Ermənistan-Azərbaycan Dağlıq Qarabağ münaqişəsinin nizama salınmasında Azərbaycanı dəstəkləyəcək, Azərbaycanın ərazi bütövlüyünü, habelə beynəlxalq hüquq və normaların bərpasını təmin edəcək.
Sonra Azərbaycan-Amerika Alyansı Direktorlar Şurasının başçısı, İndiana ştatından keçmiş konqresmen Den Berton çıxış edərək, qala-gecəyə qatıldıqlarına görə qonaqlara, ABŞ Konqresinin və administrasiyasının üzvlərinə təşəkkür edib.
Təntənəli gecə Azərbaycan musiqisi və rəqslərinin peşəkar ifaçılarının konserti ilə davam edib. Dünya şöhrətli muğam ifaçıları Alim və Fərqanə Qasımovlar bir neçə muğam kompozisiyası ifa ediblər. Sonra qonaqların gurultulu alqış sədaları altında Əməkdar Artist Tünzalə Ağayeva Azərbaycan xalq mahnıları və mərhum pop-ulduz Uitni Hyustonun repertuarından hit mahnılar, cazmen Emil Əfrasiyab Azərbaycan xalq mahnıları əsasında caz kompozisiyaları ifa edib, Əməkdar Artist Abbas Bağırov Azərbaycan və xarici mahnılarla zəngin repertuar təqdim edib.
Gecə Əməkdar Artist Natiq Şirinovun rəhbərliyi ilə “Natiq” ritm qrupunun və Azərbaycan Dövlət Mahnı və Rəqs Ansamblının çıxışı ilə davam edib. Azərbaycan musiqiçilərinin çıxışları amerikalıları valeh edib.
Gecənin iştirakçıları Azərbaycan mətbəxinin yeməklərini dadıblar.
Gecədə ABŞ Konqresinin üzvləri, ABŞ Administrasiyasının, Vaşinqtondakı diplomatik korpusun, habelə Azərbaycan diasporunun nümayəndələri iştirak ediblər.
Yusif Babanlı
AZƏRTAC -ın xüsusi müxbiri
Vaşinqton
Bölmənin digər xəbərləri
