Vaşinqtonda Gül Bayramı qeyd olunub VİDEO
Vaşinqton, 10 may, AZƏRTAC
Azərbaycanın ABŞ-dakı səfirliyi tərəfindən mayın 9-da ümummilli lider Heydər Əliyevin anadan olmasının 94-cü ildönümü münasibətilə Gül Bayramı qeyd edilib.
Tədbirdə ABŞ-da yaşayan və fəaliyyət göstərən həmyerlilərimiz və səfirliyin əməkdaşları iştirak ediblər.
Mərasimdə çıxış edən səfir Elin Süleymanov əvvəlcə xalqımızın ümummilli lideri Heydər Əliyev barədə xatirələrini bölüşüb. Müasir, müstəqil və suveren Azərbaycan dövlətinin qurucusu olan Ümummilli Liderin müxtəlif dönəmlərdə verdiyi taleyüklü qərarlar və atdığı tarixi addımlar haqqında söz açıb, onun ABŞ ilə ikitərəfli münasibətlərin genişlənməsi və möhkəmlənməsi istiqamətində gördüyü işləri xatırladıb, bunun ikitərəfli münasibətlərimiz üçün möhkəm zəmin yaratdığını qeyd edib.
Səfir Elin Süleymanov Ümummilli Liderin sadiq davamçısı Prezident İlham Əliyevin yürütdüyü qətiyyətli siyasət sayəsində Azərbaycan dövlətçiliyinin daha da möhkəmləndiyini, xalqımızın hər bir sahədə inkişafa şahid olduğunu və ölkəmizin beynəlxalq aləmdə nüfuzunun artdığını qeyd edib.
Daha sonra diplomat Azərbaycanın ABŞ-dakı səfirliyinin yerləşdiyi binanın ümummilli lider Heydər Əliyevin qərarı ilə alındığını diqqətə çatdırıb və bu binanın müstəqil Azərbaycan Respublikasının xaricdə diplomatik fəaliyyət üçün aldığı ilk mülk olduğunu vurğulayıb. Bu xüsusda Ümummilli Liderin anadan olmasının 94-cü ildönümü münasibətilə Gül Bayramının səfirlik tərəfindən təntənəli qeyd ediləcəyini, səfirliyin binasının ətrafında müxtəlif və rəngarəng güllərin, çiçəklərin əkiləcəyini bildirib.
Güllərin və çiçəklərin insanlara xoş hisslər və təəssüratlar bağışladığını, buna görə də onların əkilməsinin bir növ yaradıcı iş olduğunu xatırladan səfir ulu öndər Heydər Əliyevin əziz xatirəsinin bu yolla yad edilməsinin qanunauyğun olduğunu vurğulayıb. Eyni zamanda, güllərin əkilməsinin simvolik əhəmiyyətinə diqqət çəkən E.Süleymanov müasir Azərbaycan dövlətçiliyinin əsasında dayanan Heydər Əliyev irsinin xalqımız tərəfindən inkişaf etdirilərək gələcək nəsillərə ötürülməsini tərənnüm etdiyini vurğulayıb.
Sonra tədbir iştirakçıları səfirliyin ərazisində müxtəlif növ gül və çiçəklər əkiblər. Beləliklə, ümummilli lider Heydər Əliyevin əziz xatirəsinə əkilən güllər Vaşinqtonda Azərbaycanı təcəssüm etdirən daha bir guşəni gözəlləşdirib.
Yusif Babanlı
AZƏRTAC-ın xüsusi müxbiri
Vaşinqton
Bölmənin digər xəbərləri
