DÜNYA
VATİKAN: 2005-Cİ İLDƏ DÜNYADA 860 MİLYON UŞAQ SOSİAL İSTİSMARIN QURBANI OLMUŞDUR
2005-ci ildə bütün dünyada təxminən 860 milyon uşaq aclığın, xəstəliklərin, insan alverinin, iqtisadi və sosial istismarın digər formalarının qurbanı olmuşdur. AZƏRTAC xəbər verir ki, bu, Vatikanın burada yayılan illik məruzəsində açıqlanmışdır.
Çox böyük sayda 5-14 yaşlı uşaqların məcburi əməklə məşğul olması, habelə küçələrdə işləməsi xüsusi həyəcan doğurur. Natamam məlumata görə, onlar 200 milyondan çoxdur. Milyonlarla uşaq hərbi əməliyyatlara və pozğunluğa cəlb edilir. Bir çox ölkələrdə doğulan uşaqları qeydiyyatdan keçirmir və bununla da onları ömürlük istismar qurbanlarına çevirirlər.
Müqəddəs Taxt-tacın missioner informasiya xidmətinin – “Fides” agentliyinin yaydığı məruzədə deyilir: “Bu vəziyyət zəmanəmiz üçün rüsvayçılıqdır. 860 milyon uşağın gələcəyi aydın deyil, onların bu günü isə dəhşətlidir. Buna görə məsuliyyət yaşlıların üzərinə düşür”.