Vatikan şəhəri dövləti üzrə qubernatorluğun prezidenti öz postu ilə vidalaşıb
Vatikan, 3 mart, AZƏRTAC
Vatikan şəhəri dövləti üzrə qubernatorluğun prezidenti kardinal Fernando Vergez Alzaqa öz postu ilə vidalaşıb.
AZƏRTAC xəbər verir ki, Vatikan Dövlətində Papa Komissiyasının sədri vəzifəsini də icra edən Fernando Vergez Alzaqa 80 yaşı tamam olduğu üçün bu mühüm vəzifələrindən gedib.
Roma Katolik Kilsəsinin rəhbəri Papa Fransisk ötən ay bu posta rahibə Raffaella Petrinini təyin edib. O, Qubernatorluğun prezidenti, eləcə də Vatikan Dövlətində Papa Komissiyasının sədri vəzifələrini icra edəcək. Əlli altı yaşlı rahibə Petrini indiyədək Vatikan şəhəri dövləti üzrə qubernatorluğun Baş katibi idi.
Qeyd edək ki, Fransiskin pontifikliyi dövründə Müqəddəs Taxt-Tacda yüksək vəzifələrdə çalışan qadınların sayı xeyli artıb. 2013-2023-cü illərdə Vatikanda qadınların nisbəti 19,2 faizdən 23,4 faizə yüksəlib, bu illər ərzində qadınlar yüksək vəzifələrə təyin ediliblər.
Nihad Budaqov
AZƏRTAC-ın xüsusi müxbiri
Vatikan
Bölmənin digər xəbərləri
