Vətən müharibəsi Azərbaycan Liderinin müdrikliyini, Ordumuzun qüdrətini bütün dünyaya göstərdi – RƏY
Bakı, 3 noyabr, AZƏRTAC
Azərbaycan xalqının taleyində elə günlər var ki, onlar təkcə bir dövrün deyil, bütöv bir millətin tarixini dəyişir. 2020-ci ilin 8 Noyabrı – Zəfər Günü belə günlərdən biridir. Bu tarix Azərbaycan xalqının qürur, şərəf və birliyinin təntənəsi, Vətən müharibəsində qazanılmış böyük Qələbənin rəmzidir. Qırx dörd gün davam edən müharibə Azərbaycan Liderinin müdrikliyini, dövlətimizin gücünü, Ordumuzun qüdrətini, xalqımızın iradəsini bütün dünyaya göstərdi. Otuz ilə yaxın davam edən işğalın, sarsıntıların, danışıqların sonunda Azərbaycan xalqı öz tarixi torpaqlarını azad, ədaləti bərpa etdi. Vətən müharibəsi dövründə Azərbaycan xalqı misilsiz birlik nümayiş etdirdi. Bu birliyin mərkəzində xalq–dövlət–ordu birliyi dayanırdı. Prezident İlham Əliyev hələ müharibədən əvvəl qeyd edirdi: “Biz güclü dövlət, güclü ordu, vətənpərvər xalq sayəsində istənilən hədəfə çata bilərik”. Bu sözlər 2020-ci ilin payızında öz təsdiqini tapdı.
Bu sözləri AZƏRTAC-a açıqlamasında Milli Məclisin deputatı Şahin Seyidzadə deyib.
O bildirib ki, müharibə başladığı ilk gündən Azərbaycan xalqı Ali Baş Komandanın ətrafında sıx birləşdi. Kəndlərdə, şəhərlərdə, arxa cəbhədə, cəbhə bölgəsində – hər kəs bir amal uğrunda: Vətənin azadlığı uğrunda mübarizə aparırdı. Azərbaycan Ordusu ön cəbhədə irəlilədikcə, xalq arxa cəbhədə öz əzmini və fədakarlığını nümayiş etdirirdi. Könüllülər, həkimlər, gənclər, qadınlar, jurnalistlər – hamı bu müqəddəs mübarizədə bir-birinə dayaq idi. Bu birliyin təməlində Prezident İlham Əliyevin xalqla sarsılmaz bağları dururdu. Azərbaycan xalqı 44 gün ərzində öz milli xarakterini, əzm və iradəsini bütün dünyaya nümayiş etdirdi. Heç bir çətinlik, təzyiq və təxribat bu xalqı yolundan döndərə bilmədi.
Deputat qeyd edib ki, 44 günlük müharibə həm də müasir Azərbaycan tarixində liderlə xalqın birliyinin parlaq nümunəsi oldu. Prezident İlham Əliyev həm Ali Baş Komandan, həm də xalqın ruhunun simvoluna çevrildi. O, döyüş meydanında ordunun, diplomatik arenada isə Azərbaycanın haqq səsinin müdafiəçisi idi. Dünyanın aparıcı media orqanlarına verdiyi onlarla müsahibə ilə Ermənistanın dezinformasiyasını darmadağın etdi. “Qarabağ Azərbaycandır!” ifadəsi dünya miqyasında Azərbaycanın ədalətli mövqeyini təsdiqlədi. Bu dövrdə hər bir vətəndaş “Mən azərbaycanlıyam” deməklə fəxr edirdi. Üçrəngli Bayrağın azad edilmiş torpaqlarda dalğalanması təkcə siyasi akt deyil, həm də mənəvi qayıdış idi. Ulu Öndər Heydər Əliyevin illər öncə dediyi kimi: “Azərbaycan xalqı istənilən vaxt öz suverenliyini qorumağa qadirdir”. Bu fikir 2020-ci ildə Prezident İlham Əliyevin rəhbərliyi ilə reallığa çevrildi.
“Vətən müharibəsi təkcə döyüş meydanında deyil, həm də informasiya məkanında aparılırdı. Ermənistan illərlə yaratdığı saxta təbliğat mexanizmini işə salmışdı. Lakin bu dəfə xaricdə yaşayan soydaşlarımız Prezident İlham Əliyevin siyasətinə uyğun şəkildə fəal mövqe sərgilədilər. Müharibə dövründə gənclərin və sosial medianın rolu da mühüm idi. Onlar informasiya cəbhəsində dövlətin ideoloji xəttini dəstəkləyir, yanlış məlumatlara qarşı effektiv mübarizə aparırdılar. Bu birlik göstərdi ki, Azərbaycan xalqı təkcə bir coğrafi məkanla məhdudlaşmır – o, həm də bütün dünyada yaşayan böyük milli qüvvədir. Zəfərdən sonra xalqın həmrəyliyi daha da möhkəmləndi. Azad edilmiş torpaqlarda aparılan bərpa işləri, “Böyük Qayıdış” Proqramı bu birliyin davamıdır. Qarabağa qayıdan hər bir ailə, inşa olunan hər bir məktəb, hava limanı, yol – hamısı Qələbənin canlı davamıdır. Bu bərpa prosesi dövlətin və xalqın birgə əməyinə əsaslanır”, - deyə o vurğulayıb.
Ş.Seyidzadənin sözlərinə görə, 44 günlük Vətən müharibəsi göstərdi ki, xalqla dövlət bir olduqda heç bir qüvvə Azərbaycanı dayandıra bilməz. Prezident İlham Əliyevin müdrik rəhbərliyi, xalqın dəmir iradəsi və şəhidlərimizin qəhrəmanlığı sayəsində bu Qələbə mümkün oldu. Bu gün azad və qalib Azərbaycan yeni mərhələyə qədəm qoyur - sülh, quruculuq və inkişaf mərhələsinə. Lakin Zəfər Günü daim xalqın yaddaşında birlik, mübarizə və qürur rəmzi olaraq qalacaq.
Bölmənin digər xəbərləri
