Volqoqradda Dostluq Xiyabanı salınmışdır
Moskva, 5 noyabr (AZƏRTAC). Rusiyanın Volqoqrad vilayətində Xalqların Birliyi Günündə Dostluq Xiyabanı salınmışdır.
AZƏRTAC Volqoqrad vilayəti qubernatorunun rəsmi saytına istinadla xəbər verir ki, regionun 30-dan artıq milli icmasının nümayəndələri Mərkəzi Mədəniyyət və İstirahət Parkının ərazisində 50 ting əkmişlər.
Qeyd edək ki, Mərkəzi Mədəniyyət və İstirahət Parkının ərazisində “Dostluq parkı” layihəsi çərçivəsində yenidənqurma işləri aparılır. “Dostluq parkı”nın təntənəli təməlqoyma mərasimi “Rusiya-Azərbaycan: Regionlararası dialoq-2013” forumunun keçirildiyi günlərdə olmuşdur.
Regionun hökuməti milli ictimai birliklərin Xalqların Birliyi Günündə Mərkəzi Mədəniyyət və İstirahət Parkının ərazisində Xalqlar Dostluğu Xiyabanının salınması təşəbbüsünü dəstəkləmişdir. Burada 50 tuya ağacı əkilmişdir. Hər ağacın yanında üzərində layihədə iştirak etmiş icmanın adı olan xatirə lövhəciyi quraşdırılacaqdır.
Volqoqrad vilayətinin millətlərin və kazakların işləri üzrə naziri Sergey Çernovun sözlərinə görə, yeni Dostluq Xiyabanı müxtəlif xalqların və dinlərin birlik və vətənpərvərlik rəmzi olacaqdır.
Volqoqrad regionunda Xalqların Birliyi Gününə həsr olunmuş “Millətlər xiyabanı” adlı böyük xalq yarmarkası da keçirilmişdir. Yarmarka noyabrın 4-də İdman Sarayında açılmışdır. Burada gün ərzində interaktiv meydanlarda böyüklər və uşaqlar müxtəlif xalqların mədəniyyəti, adət-ənənələri və yaradıcılığı ilə tanış olmuş, eləcə də milli mətbəxin təamlarından dadmışlar. Bayram təntənəli konsertlə başa çatmışdır.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
