Vüqar Kərimov: Azad edilmiş ərazilər su ehtiyatları ilə çox zəngindir
Bakı, 29 dekabr, AZƏRTAC
Azad edilmiş ərazilər su ehtiyatları ilə çox zəngindir. Həmin ərazilərdəki su ehtiyatları su qıtlığından əziyyət çəkən ölkəmiz üçün su ehtiyatlarının səmərəli istifadəsi, idarə olunmasında mühüm rola malikdir. 1990-cı illərin statistikasına istinad etsək, işğaldan azad edilmiş ərazilərimizin 2 milyard kubmetrə yaxın su ehtiyatları var. Həmin su ehtiyatları təkcə o ərazilərin deyil, qonşu ərazilərin - Bərdə, Goranboy rayonları, o cümlədən Ağdamın aşağı hissəsinin, Tərtərin suyu az alan əkin sahələrinin suvarılması üçün və azad edilmiş torpaqlara köçürüləcək sakinlərin şirin su ilə təmin olunması üçün çox böyük imkanlardır.
AZƏRTAC xəbər verir ki, bunu ekologiya və təbii sərvətlər nazirinin müavini Vüqar Kərimov bildirib.
“Azad edilmiş ərazilərdə 9 su anbarı, 14 iri çay var. On bir çay hövzəsi üzərində avtomatik suölçmə cihazları quraşdırılır. İki yeni su anbarının - Həkəri və Bərgüşad çayları üzərində yeni su anbarlarının tikilməsi ilə bağlı layihələr var. Növbəti dövrlərdə texniki əsaslandırma sənədləri hazırlanandan, bununla bağlı müvafiq qərar veriləndən sonra layihələndirmə və tikinti işlərinə başlanılacaq”, - deyə nazir müavini diqqətə çatdırıb.
Bölmənin digər xəbərləri
