Bakı, 20 sentyabr, AZƏRTAC

"Bizi çox maraqlı oyun gözləyir. "Neftçi"dən fərqli olaraq, "Qarabağ"ın komplektləşmiş heyəti var".

Bu sözləri AZƏRTAC-a açıqlamasında Azərbaycan millisinin və "Qarabağ"ın sabiq futbolçusu Vüqar Nadirov keçmiş komandasının Misli Premyer Liqasının VII turunda "Neftçi" ilə keçirəcəyi derbi oyunu barədə danışarkən deyib.

O, bugünkü oyunda “köhlən atlar”ın favorit olduğunu bildirib: "Hər iki komandaya xal lazımdır. "Qarabağ" "Turan Tovuz"a uduzub, "Neftçi" isə istədiyi oyunu nümayiş etdirə bilmir. Ağdam təmsilçisi Avropa Liqasında İngiltərə "Tottenhem"i ilə ağır oyun öncəsi çətin sınaq qarşısına çıxacaq. Roman Qriqorçukla "Qəbələ"də bir müddət bir yerdə işləmişik. Çox tələbkar məşqçidir. Düşünürəm ki, ona vaxt lazımdır. İndidən Qriqorçuku tənqid etmək olmaz".

Qeyd edək ki, “Azersun Arena”da keçiriləcək “Qarabağ” - “Neftçi” görüşü saat 20:00-da başlayacaq. Rəqibindən 1 oyun az keçirən Ağdam təmsilçisi 12 xalla 2-ci pillədə qərarlaşıb. 4 xalı olan Bakı klubu isə 9-cu sıradadır.