“www.kobmarket.az” onlayn satış portalında 50 faizədək endirim tətbiq olunacaq
Bakı, 2 avqust, AZƏRTAC
Sahibkarların, xüsusilə də mikro və kiçik biznes subyektlərinin məhsullarının daha geniş auditoriyaya tanıdılması və satışının artırılması, eləcə də alıcıların alış-veriş imkanlarının genişləndirilməsi məqsədilə “www.kobmarket.az” portalında yerləşdirilmiş məhsullara endirim tətbiq olunacaq.
Kiçik və Orta Biznesin İnkişafı Agentliyindən (KOBİA) AZƏRTAC-a bildirilib ki, avqustun 6-da “www.kobmarket.az” portalından alış-veriş edən hər kəs 50 faizə qədər endirimli satışdan yararlana biləcək. Endirim kampaniyası çərçivəsində Bakı şəhəri üzrə bütün sifarişlər pulsuz çatdırılacaq.
Qeyd edək ki, sahibkarların onlayn satış imkanlarının genişləndirilməsi məqsədilə Kiçik və Orta Biznesin İnkişafı Agentliyinin dəstəyi ilə yaradılmış “www.kobmarket.az” ticarət platformasında hazırda 50-dən artıq onlayn mağaza fəaliyyət göstərir və 700-dən çox adda məhsul yerləşdirilib. Növbəti mərhələdə portala məhsullarla yanaşı, müxtəlif xidmətlərin yerləşdirilməsi də nəzərdə tutulur.
Bölmənin digər xəbərləri
