Xalq artisti Vaqif Mustafayev: “Fikrət Əmirov” filminin yaradıcı həyatımda xüsusi yeri var
Bakı, 26 oktyabr, AZƏRTAC
Bakı Dövlət Universitetində Ümummilli Lider Heydər Əliyevin 100 illik yubileyi və qardaş Türkiyə Cümhuriyyətinin 100-cü ildönümünə həsr olunmuş III Beynəlxalq Türk Dünyası Kommunikasiya (Media) və İncəsənət Simpoziumunun açılış mərasimindən sonra Türk Dünyası Jurnalistlər Federasiyasının təşkilatçılığı ilə Ankarada keçirilən “VIII Türk Dünyası Sənədli Film Festivalı”nda Baş mükafatı qazanan Xalq artisti, rejissor Vaqif Mustafayevin “Fikrət Əmirov” filmi nümayiş olunub.
Xalq artist Vaqif Mustafayev AZƏRTAC-a müsahibəsində ssenari müəllifi və quruluşçu rejissoru olduğu film haqqında məlumat verib. O, bildirib ki, görkəmli Azərbaycan bəstəkarı, Xalq artisti, Dövlət mükafatları laureatı Fikrət Əmirovun həyatı, bənzərsiz sənəti, zəngin musiqi yaradıcılığı böyük maraq doğurur. Bəstəkar öz ölməz əsərləri ilə mədəniyyətimizə və incəsənətimizə əvəzsiz töhfələr verib.
Vaqif Mustafayev “Fikrət Əmirov” filminin ərsəyə gəlməsindən danışaraq böyük bəstəkarın bənzərsiz musiqi yaradıcılığına sonsuz sevgisini ifadə edib: “Bu filmi çəkməklə özümü xoşbəxt hiss edirəm. Əvvəlki filmlərimdə olduğu kimi, burada da mövzuya tam səmimiyyətlə yanaşmışam. Bu filmin mənim yaradıcı həyatımda xüsusi yeri var”.
Xalq artisti filmin 5 dilə tərcümə olunduğunu bildirib.
Qeyd edək ki, filmdə Fikrət Əmirovun dünyaya göz açdığı mühit, şəxsiyyət kimi yetişməsi, sənəti dolğunluğu ilə təqdim olunur. Onun Azərbaycanı ölməz musiqiləri ilə dünyaya tanıdan sənətkar kimi yaradıcılıq məziyyətlərindən bəhs edilir.
Mükafata layiq görülən filmlərin dünyanın doqquz ölkəsində nümayişi planlaşdırılır.
Bölmənin digər xəbərləri
