“Xalq yaradıcılığı paytaxtları” Proqramı bölgələrin mədəni həyatının dirçəldilməsində böyük rol oynayır
Qax, 9 iyun, Mustafa Dadaşov, AZƏRTAC
Mədəniyyət və Turizm Nazirliyinin təsdiq etdiyi yeni “Xalq yaradıcılığı paytaxtları” Proqramına əsasən, Qax şəhərinin 2015-ci il üçün “Azərbaycanın milli mətbəx paytaxtı” elan edilməsi milli mənəvi dəyərlərimizə, rayonun milli mətbəxinə verilən çox yüksək qiymətdir. “Paytaxt ili” çərçivəsində indiyədək həyata keçirilən və nəzərdə tutulan tədbirlər rayonun mədəni həyatının dirçəldilməsi, Qaxın milli kulinariyasının, eləcə də zəngin turizm potensialının daha yaxından tanıdılması və təbliği baxımından böyük əhəmiyyət daşıyır.
Bu sözləri Qax rayon mədəniyyət və turizm şöbəsinin məsləhətçisi Dilarə Əzizova AZƏRTAC-a müsahibəsində söyləyib.
Qaxın “Azərbaycanın milli mətbəx paytaxtı” elan edilməsinin heç də təsadüfi olmadığını vurğulayan D.Əzizova deyib: “Paytaxt şəhərlər seçilərkən rayonun mədəni həyatı, iqtisadi göstəriciləri hərtərəfli təhlil edilir. Bu baxımdan, son illər Qax rayonunun sosial-iqtisadi və mədəni həyatında da çox böyük dəyişikliklər baş verib, rayonun şəhər və kəndlərində geniş quruculuq və abadlıq işləri aparılıb, yol infrastrukturu yenilənib. Geniş turizm potensialına malik olan rayonda bu sahənin inkişaf etdirilməsi üçün zəruri tədbirlər görülüb, yeni turizm istirahət mərkəzləri tikilib istifadəyə verilib. Hazırda rayonda respublika, eləcə də beynəlxalq səviyyəli tədbirlərin keçirilməsi üçün çox yaxşı infrastruktur mövcuddur”.
Müsahibimizin dediyinə görə, qədim tarixi abidələri ilə məşhur olan Qax, zəngin mətbəxi ilə də digər rayonlardan seçilir. Tolerantlığın qorunub saxlandığı məkan olan Qaxda bir çox millətlərin nümayəndələri yaşayır. Bu millətlərin hər birinin özünəməxsus adət-ənənələri və milli mətbəxi var. Bütün bu amillər Qaxın “paytaxt şəhər” elan edilməsində əsas rol oynayıb.
Rayonun mətbəxinin özünəməxsusluğu və zənginliyi barədə danışan Dilarə Əzizova deyib: “Qaxda ətin qurudularaq “qaxac” edilməsinin qədim tarixi var. Qurudulmuş ətdən xəmir xörəklərinin - sürhüllü, xingili, əriştə, həmçinin müxtəlif növ plovun bişirilməsi dağ kəndləri üçün daha xarakterikdir. Bu yerlərin əhalisi xəmir xörəklərini daha çox xoşlayır. Toyuqlu, lobyalı, qatıqlı xəngəl, qiyməli, göyərtili, çürümtəkli girs, lobyalı, tərəcəli, göləsli, balqabaqlı, tutlu plov və digər növ xörəklər Qax əhalisinin ən sevimli yeməklərindəndir. Bundan əlavə, qozu və fındığı ilə də tanınan Qaxda bu çərəzlərdən xüsusi şirniyyatlar - fındıq çörəyi, paxlava, şəkərbura, ovma, düyü halvası və digər şirniyyat növləri də hazırlanır. Sadalanan bütün bu yemək və şirniyyat növləri rayona təşrif buyuran yerli və xarici turistlərin də çox xoşuna gəlir”.
“Paytaxt şəhər” proqramı çərçivəsində rayonda keçirilən tədbirlər barədə məlumat verən mədəniyyət və turizm şöbəsinin təmsilçisi tədbirlər planında, həmçinin il ərzində rayonda zona, respublika və beynəlxalq səviyyəli bir sıra tədbirlərin, festivalların, müsabiqələrin, konfransların keçirilməsinin də nəzərdə tutulduğunu bildirib. O qeyd edib ki, bu tədbirlərdə rayonun, eləcə də respublikamızın müxtəlif bölgələrinin, həmçinin dünya xalqlarının mətbəx nümunələrinin nümayiş etdirilməsi nəzərdə tutulur.
Bölmənin digər xəbərləri
