Xalqımız Azərbaycan Prezidentinin qlobal problemlərin həllindəki rolunu yüksək dəyərləndirir və bundan qürur duyur
Bakı, 9 iyul, AZƏRTAC
Yeni Azərbaycan Partiyası (YAP) Zərdab rayon təşkilatı “Qoşulmama Hərəkatının sədri kimi, Prezident İlham Əliyevin BMT Baş Assambleyasının COVID-19-a həsr olunmuş xüsusi sessiyasının keçirilməsinə dair təşəbbüsünə dünyanın dəstəyi” mövzusunda videokonfrans keçirib.
YAP-dan AZƏRTAC-a bildiriblər ki, onlayn tədbirdə çıxış edən YAP Zərdab rayon təşkilatının sədri Pərvin Mahmudova Prezident İlham Əliyevin rəhbərliyi ilə Azərbaycan dövlətinin regional və qlobal səviyyədə COVID-19 pandemiyasının yayılmasının qarşısının alınması və təsirlərinin minimuma endirilməsi istiqamətində atdığı addımlardan danışıb. Qeyd olunub ki, pandemiya bu gün insanların həyatını təhlükə altına qoyan ciddi sağlamlıq problemləri yaratmaqla yanaşı, mənfi fəsadları hələ uzun müddət hiss olunacaq qlobal sosial-iqtisadi və humanitar təhlükələrə yol açıb.
P.Mahmudova COVID-19 pandemiyası şəraitində qlobal həmrəyliyə böyük ehtiyac yarandığını deyib: “Prezident İlham Əliyevin Qoşulmama Hərəkatının onlayn Zirvə görüşündə çıxışında qlobal həmrəyliyin nümunəsi kimi pandemiya ilə mübarizə məqsədilə BMT Baş Assambleyasının dövlət və hökumət başçıları səviyyəsində videokonfrans vasitəsilə xüsusi sessiyasının keçirilməsi təklifi 130-dək ölkə tərəfindən dəstəklənib. Qeyd edilməlidir ki, 130-a qədər BMT üzvü olan dövlət tərəfindən Qoşulmama Hərəkatının sədri statusunda Prezident İlham Əliyevin təşəbbüsünün dəstəklənməsi beynəlxalq ictimaiyyət tərəfindən ölkəmizə olan böyük etimadın və hörmətin növbəti göstəricisidir. Xalqımız Azərbaycan Prezidentinin qlobal problemlərin həllindəki rolunu yüksək dəyərləndirir və hər birimiz bundan qürur duyuruq”.
Təşkilat sədri bu təşəbbüsə qarşı çıxış edən yeganə dövlətin Ermənistan olduğunu bildirib. O, əlavə edib ki, bütün dünya COVID-19-a qarşı mübarizədə qlobal həmrəyliyin vacibliyini vurğuladığı halda, Ermənistanın qlobal xarakter daşıyan bu təşəbbüsə qarşı çıxış etməsi onların əsl simasını bir daha beynəlxalq ictimaiyyətə nümayiş etdirdi. Bütün dünya bir daha Ermənistanın əsl irticaçı mahiyyətinin şahidi oldu.
Videokonfransda digər çıxış edənlər də bildiriblər ki, Prezident İlham Əliyevin irəli sürdüyü və 130-dək dövlətin dəstəklədiyi bu təşəbbüs pandemiyaya qarşı mübarizədə beynəlxalq ictimaiyyətin tam olaraq səfərbər olunmasına şərait yaradacaq və bu qlobal bəladan xilas olmağa müsbət töhfəsini verəcək.
Bölmənin digər xəbərləri
