Xankəndidə “Azərbaycan mədəniyyətində Üzeyir Hacıbəyli fenomeni” mövzusunda elmi-praktik seminar keçirilib
Bakı, 22 oktyabr, AZƏRTAC
Mədəniyyət Nazirliyi Mədəniyyət üzrə Elmi-Metodiki və İxtisasartırma Mərkəzi (MEMİM) tərəfindən Qarabağ bölgəsində həyata keçirilən “Mədəniyyət rüzgarı” layihəsi çərçivəsində Qarabağ Universitetinin İncəsənət fakültəsində “Azərbaycan mədəniyyətində Üzeyir Hacıbəyli fenomeni” mövzusunda elmi-praktik seminar təşkil olunub.
MEMİM-dən AZƏRTAC-a bildirilib ki, dahi bəstəkar, musiqişünas-alim, pedaqoq, publisist, dramaturq, ictimai xadim Üzeyir Hacıbəylinin 140 illiyinə həsr olunan tədbirdə universitetin professor-müəllim heyəti və tələbələri iştirak ediblər.
Əvvəlcə tədbir iştirakçıları Şuşa şəhərində Üzeyir Hacıbəylinin, Bülbülün və Xurşidbanu Natəvanın büstlərini ziyarət ediblər.
Seminarda Qarabağ Universiteti İncəsənət fakültəsinin dekanı bəstəkar Türkər Qasımzadə və MEMİM-in direktor vəzifəsini icra edən sənətşünaslıq üzrə fəlsəfə doktoru dosent Vüqar Hümbətov çıxış edərək tədbirin məqsədinin müasir Azərbaycan professional musiqisinin banisi olan Üzeyir Hacıbəylinin zəngin yaradıcılıq irsini gənc nəsillərə çatdırmaqla onları maarifləndirməkdən ibarət olduğunu deyiblər. Bildirilib ki, Üzeyir Hacıbəyli fenomeni bir əsrdən çoxdur mədəniyyətimizin inkişafına öz töhfəsini verir. Dahi bəstəkarın musiqi irsi dünya miqyasında Azərbaycan mədəniyyətinin zənginliyini nümayiş etdirir.
Sonra seminar MEMİM-in əməkdaşı, Əməkdar mədəniyyət işçisi, sənətşünaslıq üzrə fəlsəfə doktoru Səadət Təhmirazqızının moderatorluğu ilə davam edib. Əməkdar incəsənət xadimi, sənətşünaslıq üzrə fəlsəfə doktoru, Bakı Musiqi Akademiyasının professoru Zümrüd Dadaşzadə “Üzeyir Hacıbəyli dühası XXI əsrin mədəniyyət güzgüsündə” adlı yeni faktlar və sənədlərlə zəngin məruzəsində sənətkarın yaradıcılığını dünya musiqisi kontekstində işıqlandırıb, onun ideyalarının həmişəyaşarlığı fikrini vurğulayıb.
Sənətşünaslıq üzrə fəlsəfə doktoru, Qarabağ Universiteti İncəsənət fakültəsinin baş müəllimi Aybəniz Növrəsli “Üzeyir Hacıbəyli və musiqi pedaqogikası” mövzusunda çıxış edərək musiqi təhsili sahəsində mövcud müxtəlif sistemlərdən söz açıb, onlardan bəhrələnməyin zəruriliyi məsələsinə toxunub.
Məruzəçilər auditoriyanın suallarını cavablandırıb. Sonra Qarabağ Universitetinə bir sıra elmi nəşrlər hədiyyə edilib.
Sonda bədii proqram təqdim olunub.
Qarabağ Universiteti tələbə xorunun (bədii rəhbər: Rüfət Xəlilov, konsermeysterlər: Ehtiram Ağazadə, Aytac Dadaşova) ifasında Ü.Hacıbəylinin “Arşın mal alan” operettasından “Qızların xoru” və “Leyli və Məcnun” operasından “Şəbi-hicran” xoru səsləndirilib.
İncəsənət fakültəsinin müəllimi Əməkdar artist Anar Şuşalı “Arşın mal alan”dan Əsgərin ariyasını (konsertmeyster: həmin fakültənin müəllimi, pianoçu Zakir Əsədov) ifa edib. Tələbələr İsmayıl İsmayılov və Elnarə Abdullayeva isə “Leyli və Məcnun” operasından “Görüş” səhnəsini səsləndiriblər. Onları fakültənin müəllimləri Bəhruz Zeynalov (tar) və Fərid Babayev (kamança) müşayiət ediblər.
Xatırladaq ki, MEMİM-in Qarabağda “Mədəniyyət rüzgarı” layihəsi oktyabrın 20-dən 31-dək Qarabağ Regional Mədəniyyət İdarəsinin dəstəyi ilə gerçəkləşir.
Bölmənin digər xəbərləri
