SİYASƏT
Xarkov Diplomatik Klubunda Azərbaycanın uğurlu xarici siyasəti müsbət dəyərləndirilib VİDEO
Xarkov, 9 iyun, AZƏRTAC
Azərbaycanın uğurlu xarici siyasət kursu Xarkov Diplomatik Klubunun üzvləri tərəfindən müsbət dəyərləndirilib.
AZƏRTAC xəbər verir ki, Azərbaycanın Ukraynadakı fövqəladə və səlahiyyətli səfiri Elmira Axundovanın Xarkov Diplomatik Klubunda keçirdiyi görüşdə klubun fəxri prezidenti Sergey Çernov, prezidenti Emin Nəcəfli, Qazaxıstan, Türkiyə, Albaniya və Gürcüstanın Xarkovdakı fəxri konsulları, Xarkov Şəhər Şurasının deputatları, rəsmiləri iştirak ediblər.
Görüşdə çıxış edən Sergey Çernov bildirib ki, Azərbaycanın uğurlu xarici siyasəti nəticəsində bir çox ölkələrlə strateji müttəfiqlik münasibətləri yaranıb. Bu ölkələrdən biri də Ukraynadır. Ukrayna ilə Azərbaycan arasında strateji tərəfdaşlıq münasibətləri mövcuddur. Onun sözlərinə görə, Azərbaycanın uğurlu siyasəti ilə bölgədə nüfuzlu dövlətə çevrilib və bir sıra beynəlxalq enerji layihələrinin müəllifidir.
Səfir Elmira Axundova çıxışında qeyd edib ki, əsası ümummilli lider Heydər Əliyev tərəfindən qoyulan Azərbaycanın uğurlu xarici siyasəti bu gün Prezident İlham Əliyev tərəfindən layiqincə davam etdirilir. Prezident İlham Əliyevin uğurlu xarici siyasəti Azərbaycanın milli maraqlarına söykənir.
“Müasir dövrdə Azərbaycan Cənubi Qafqaz regionunda əsas söz sahibi olan dövlət kimi çətin və mürəkkəb geosiyasi şəraitdə müstəqil xarici siyasət həyata keçirir. Azərbaycan düşünülmüş daxili və xarici siyasəti ilə həm inkişaf edir, iqtisadi sistemini təkmilləşdirir, həm də regional təhlükəsizliyin təmin olunması istiqamətində sistemli addımlar atır. Hazırda Azərbaycan dövlətinin həyata keçirdiyi enerji layihələri, regional inteqrasiyaya xidmət edən əməkdaşlıq formatları Cənubi Qafqazda sabitliyin təmin edilməsində mühüm rol oynayır”, - deyə səfir əlavə edib.
Vətən müharibəsindən danışan Elmira Axundova bildirib ki, Azərbaycanın haqlı mübarizəsində Prezident, Ali Baş Komandan İlham Əliyev müzəffər Ordumuzun döyüşlərdəki uğurları ilə eyni vaxtda informasiya siyasətinə də rəhbərlik edərək Azərbaycanın haqq səsinin dünya mediasına və birliyinə çatdırdı, diplomatik sahədə və informasiya müharibəsində uğurlarımız Qarabağın işğaldan azad edilməsi prosesində qələbəmiz üçün müstəsna əhəmiyyət kəsb etdi. Prezident İlham Əliyev sübut etdi ki, Azərbaycan xalqı qəhrəman xalqdır. Bu gün isə işğaldan azad olunan ərazilərimiz yenidən qurulur və bərpa edilir.
Qazaxıstanın Xarkovdakı fəxri konsulu, Xarkov Diplomatik Klubunun prezidenti Emin Nəcəfli çıxışında klubun fəaliyyətindən, ölkələr arasında dialoqun əhəmiyyətindən danışıb. Bildirib ki, Xarkov Diplomatik Klubunda Ukraynanın və xarici ölkələrin nüfuzlu diplomatları, ictimai xadimləri cəmləşib. Məqsəd isə ölkələr arasında münasibətlərin inkişafına, regionda sülhün bərqərar olmasına töhfə verməkdir.
Qeyd edək ki, Xarkov Diplomatik Klubuna 16 fəxri konsul, 6 fəxri prezident, 1 baş konsul, 8 diplomatik missiya nümayəndəsi üzvdür.
Emil Hüseynli
AZƏRTAC-ın xüsusi müxbiri
Kiyev