Xocalı soyqırımı qurbanlarının xatirəsi Türkiyənin şəhərlərində anılır
Ankara, 25 fevral (AZƏRTAC). Xocalı soyqırımının 21-ci ildönümü ilə bağlı Türkiyənin şəhərlərində konfranslar və anma tədbirləri davam edir.
Giresun şəhərindəki Ataparkda keçirilmiş Xocalı mitinqində Azərbaycan və Türkiyənin millət vəkilləri, Giresun Universitetinin tələbə-müəllim kollektivi və şəhər sakinləri iştirak etmişlər. Aksiya iştirakçıları XX əsrin ən dəhşətli faciəsinə etirazlarını ifadə etmiş, “Xocalıya ədalət!” şüarı səsləndirmişlər. Giresun Universitetində keçirilən konfransda çıxış edən Milli Məclisin deputatı Aydın Mirzəzadə, Türkiyənin millət vəkili Sinan Oğan, rektor, professor Aygün Attar, Qazi Universitetinin professoru Cəmaləddin Taşkıran, AMEA-nın Qarabağ tarixi şöbəsinin müdiri, professor Qasım Hacıyev Dağlıq Qarabağın və ətraf rayonların Ermənistan tərəfindən işğalı, Xocalı soyqırımı haqqında çıxışlar etmişlər. Konfransdan sonra Xocalı soyqırımını əks etdirən fotosərgi ilə tanışlıq olmuşdur.
Xocalı soyqırımı ilə bağlı daha bir tədbir Samsun şəhərindəki 19 May Universitetində olmuşdur. “Xocalı qətliamı” mövzusunda konfransda professor İlqar Niftəliyev, Azərbaycan Mədəniyyət və Həmrəylik Dərnəyinin sədri Fəridə Qasımzadə, universitetinin professorları Fatih Yüksel, Hüsrev Mennan, Azər Qasımzadə və digərləri Ermənistan-Azərbaycan, Dağlıq Qarabağ münaqişəsi, Ermənistan-Türkiyə problemi, Xocalı soyqırımı haqqında məruzələr təqdim etmişlər.
Ərzurumdakı Cümhuriyyət prospektində Əsassız Erməni İddiaları ilə Mübarizə Dərnəyinin təşkilatçılığı ilə Xocalı sərgisinin açılışı keçirilmişdir. Burada çıxış edən Atatürk Universitetinin dosenti Savaş Əyilməz bildirmişdir ki, dərnək Xocalı soyqırımı və ermənilərin törətdikləri digər qətliamları dünyada tanıtmaq məqsədilə 4 dildə sənədli film hazırlamışdır.
Xocalı soyqırımının 21-ci ildönümü ilə bağlı Elazığ Fırat və Sakarya Universitetlərində də konfranslar keçirilmişdir.
İstanbul Aydın Universitetində “Xocalı qətliamı 21-ci ilində” mövzusunda konfrans və sərgi keçirilmişdir. Burada Xocalı soyqırımı tablosunun (layihə müəllifi doktor Harun Sözen, rəssam Ersoy Ayyıldız) təqdimatı da olmuşdur .
Türkiyədə Xocalı soyqırımı tədbirləri davam edir.
Oqtay Bayramov
AZƏRTAC-ın xüsusi müxbiri
Ankara
Bölmənin digər xəbərləri
