Astara, 21 fevral, Bağır Əliyev, AZƏRTAC

Xocalı soyqırımı Azərbaycanın ictimai-siyasi fikir tarixində əsas yerlərdən birini tutmaqla dövlətimizin həm daxili, həm də xarici siyasətində daim diqqət mərkəzindədir.

AZƏRTAC-ın bölgə müxbiri xəbər verir ki, bu fikir Astara şəhərindəki Heydər Əliyev Mərkəzində Xocalı soyqırımının 28-ci ildönümünə həsr olunmuş “Xocalı Soyqırımı-XX əsrin faciəsi” mövzusunda keçirilən tədbirdə səsləndirilib.

Tədbir iştirakçıları əvvəlcə Mərkəzin fondunda saxlanılan Xocalı şəhidlərinin fotoşəkilləri, kitabları və “Rəssamlıq” dərnəyinin üzvlərinin Xocalı soyqırımına həsr olunmuş əl işlərindən ibarət sərgi ilə tanış olublar.

Anım tədbirində Azərbaycanın suverenliyi və ərazi bütövlüyü uğrunda şəhid olanların xatirəsi bir dəqiqəlik sükutla yad edilib.

Azərbaycan Respublikasının dövlət himni səsləndirildikdən sonra tədbir iştirakçıları “Xocalı qətliamı” filminə baxıblar.

Tədbirdə mərkəzin fondunun baş mühafizi Elza Kazımovanın mövzu ilə bağlı məruzəsi dinlənilib.

Qeyd olunub ki, Xocalı soyqırımından 28 il ötür. 1992-ci il fevralın 25-dən 26-na keçən gecə erməni silahlı dəstələri Xankəndi şəhərində yerləşdirilmiş keçmiş SSRİ-nin 366-cı motoatıcı hərbi alayının köməyi ilə silahsız və köməksiz Xocalı şəhərinə hücum ediblər.

Dörd tərəfdən erməni qoşunları tərəfindən əhatə olunan Xocalıya artilleriya və ağır hərbi texnikadan güclü və amansız atəş açılıb.

Ermənistan silahlı qüvvələrinin mühasirəsində qalmış şəhər sakinlərindən 613-ü, o cümlədən 106 qadın, 63 uşaq və 70 qoca öldürülüb, 487 dinc sakin ağır yaralanıb, 1275 nəfər isə girov götürülüb.

Bildirilib ki, 1993-cü ildə xalqın təkidi ilə yenidən Azərbaycana hakimiyyətə qayıdan ümummilli lider Heydər Əliyev daxili sabitliyin təmin olunması, siyasi, iqtisadi tənəzzülün qarşısının alınması istiqamətində fəaliyyətə başladı.

1994-cü ildə atəşkəsə nail olundu. Artıq Ermənistan-Azərbaycan, Dağlıq Qarabağ münaqişəsinə tamam başqa bir rakursdan baxıldı.

Ulu öndər Heydər Əliyev Xocalı soyqırımının tanınmasının əsas səbəbkarı, təşəbbüskarıdır. Hələ Prezident səlahiyyətlərini həyata keçirərkən Azərbaycan Respublikasının Ali Sovetinin sədri vəzifəsində çalışan böyük rəhbər erməni təcavüzünün qarşısının alınması məqsədilə təcili tədbirlər görülməsi üçün BMT Təhlükəsizlik Şurasının dərhal çağırılması xahişi ilə Təhlükəsizlik Şurasının sədrinə 26 iyul 1993-cü il tarixində yazılı müraciət edib.

Milli Məclisin 24 fevral 1994-cü il tarixli qərarı ilə hər il fevralın 26-sı “Xocalı Soyqırımı Günü” kimi yad olunması və bu barədə beynəlxalq təşkilatlara məlumat verilməsi ilə Xocalı soyqırımına ilk dəfə siyasi qiymət verilmiş oldu.

Diqqətə çatdırılıb ki, bu gün Prezident İlham Əliyevin səyi, Azərbaycanın artan nüfuzu, uğurlu diplomatiyası sayəsində dünya ictimaiyyəti başa düşür ki, Ermənistanın idarə olunan siyasətinin əsasında terrorçuluq və işğalçılıq siyasəti dayanır.

Heydər Əliyev Fondunun təşəbbüsü ilə beynəlxalq səviyyədə aparılan ideoloji təbliğatın əsas prioritetləri Dağlıq Qarabağ haqqında həqiqətləri, Xocalı soyqırımını dünya ictimaiyyətinə çatdırmaqdır.

Heydər Əliyev Fondunun vitse-prezidenti Leyla Əliyevanın təşəbbüsü ilə başlanmış, bütün dünya birliyi tərəfindən dəstəklənən "Xocalıya ədalət" kampaniyasını genişləndirməkdə də məqsəd ermənilərin azərbaycanlılara qarşı törətdiyi soyqırımı barədə həqiqətləri beynəlxalq aləmdə yaymaqdır.

Tədbirdə mövzu ilə bağlı Astara Rayon İcra Hakimiyyətinin ictimai-siyasi və humanitar məsələlər şöbəsinin baş məsləhətçisi Mirzəli Bayramov, Lənkəran Regional Mədəniyyət İdarəsinin baş məsləhətçisi Şadoğlan Bayramov, Heydər Əliyev Mərkəzinin direktoru Kübra Səmədova, Astara Rayon Mərkəzləşdirilmiş Kitabxana Sisteminin direktor əvəzi İlyas Məmmədov, Astara Rayon Tarix-Diyarşünaslıq Muzeyinin baş fond mühafizi Şahin Əliyev çıxış edərək Xocalı soyqırımının bütün dünyada tanınmasında dövlətimizin həyata keçirdiyi tədbirlərin əhəmiyyətini yüksək dəyərləndiriblər.

Sonda məktəblilər Xocalı soyqırımına həsr olunmuş şeirlər ifa ediblər.