Xocalıdan çiçəkli salamlar - FOTO
Xocalı gül-çiçək ətirli çəmənzarı xatırladır
Xocalı, 25 iyul, Tahir Ağaməmmədov, AZƏRTAC
Bir vaxt ağrı-acımızın, iztirab və göz yaşımızın ünvanına çevrilən Xocalı indi hər gün bir az da abadlaşır, gözəlləşir. Ah-naləsi ərşə çəkilən torpaqlar bu gün gül-çiçək ətirli çəmənzarı xatırladır. Göz işlədikcə uzanan ərazilərdə dekorativ bitkilər yetişdirilir. Söhbət Bakı Abadlıq Xidmətinin Xocalıda yaratdığı fidanlıqdan gedir.
AZƏRTAC-ın bölgə müxbiri xəbər verir ki, ərazidə yaşıllaşdırma işləri aparan “Green garden” şirkətinin fidanlığının ərazisi 1,2 hektardır. 30 il baxımsız qalmış bomboz çöllük indi yamyaşıl məkana çevrilib.
“Green garden” şirkətindən verilən məlumata görə, burada Afrika zanbağı (aqapantus), dəvədabanı (limonius), yusudum, qaratikan (ligustrum), Teksas qaratikanı (ligustrum-teksanum) kimi dekorativ bitkilər yetişdirilir. Növ seçimi zamanı həmişəyaşıl bitkilər daha çox üstünlük təşkil edir ki, bu da ilboyu faydalı məhsul götürməyə imkan verir.
Fidanlığa nəzarət ən yeni elmi metodlardan istifadə etməklə həyata keçirilir. Hər səhər fəaliyyətə başlayan işçilərə Sağlamlıq, Əməyin Təhlükəsizliyi və Ətraf Mühitin Mühafizəsi (SƏTƏM) üzrə mühəndis tərəfindən xüsusi təlim keçirilir, mövsümə, hava şəraitinə, bitkilərin inkişaf səviyyəsinə uyğun olaraq gündəlik iş planı tərtib edilir, bütün bunlardan sonra kollektiv iş başına keçir. Əməkdaşlar sanki hər gülün, hər çiçəyin dilini başa düşür, günün hansı vaxtı nə iş görmək lazım olduğunu bilirlər.
Xocalı şəhər fidanlığı ərazisində qızılgül istixanası da yaradılıb. Burada əsasən sarmaşıq güllər, yerli növ qızılgüllər, Niderland qızılgülləri yetişdirilir. Bu güllərin əvvəl şitili əkilir, vaxtı-vaxtında qulluq olunur, bitkilər inkişaf etdikcə dibçəklərə köçürülür. Hazırda dibçəklərdə 3000-ə qədər qızılgül var.
Fidanlıqda yetişdirilən dekorativ bitkilər və güllər Bakı Abadlıq Xidmətinin yaşıllaşdırma və landşaft dizaynı işlərini həyata keçirdiyi digər yaşayış yerlərinə də göndərilir.
Bu gözəlliyi yaradanlar əsasən yerli Xocalı sakinləridir. Vətəni azad və abad görmək onların hər birinin çoxdankı arzusudur.
Bakı Abadlıq Xidmətinin bu istiqamətdə gördüyü işlər isə maraqlı təşəbbüs, uğurlu bir nümunədir.
Bölmənin digər xəbərləri
