Yaponiya Ukraynaya təqribən 3 milyard dollar kredit verəcək
Kiyev, 18 aprel, AZƏRTAC
Yaponiya Ukraynaya təxminən 3 milyard dollar kredit verəcək.
AZƏRTAC bu barədə Ukrayna Maliyyə Nazirliyinin mətbuat xidmətinə istinadla məlumat yayıb.
Notalar mübadiləsi formasında kredit Sazişini Ukraynanın maliyyə naziri Sergey Marçenko və Yaponiyanın bu ölkədəki səfiri Masaşi Nakaqome imzalayıblar.
Kreditə xidmət göstəriləcək və immobilizasiya edilmiş Rusiyanın suveren aktivlərindən gələcək gəlirlər hesabına ödəniləcək.
Maliyyələşdirmə 30 il müddətinə verilir. Toplanan vəsaitlər prioritet büdcə ehtiyaclarını dəstəkləmək, habelə Ukraynanın bərpası və inkişafına kömək etmək üçün istifadə olunacaq.
“Yaponiya bizim azadlıq və ləyaqət uğrunda mübarizəmiz zamanı Ukraynanın aparıcı tərəfdaşlarından birinə çevrilərək beynəlxalq həmrəyliyin parlaq nümunəsi olub”, -deyə Ukrayna Maliyyə Nazirliyinin rəhbəri bildirib.
Vəsaitlər təxminən 50 milyard dollar olan G7 ERA mexanizminin bir hissəsidir. ABŞ-dan 20 milyard, Aİ-dən 20 milyard, Böyük Britaniyadan 3 milyard, Kanadadan isə 3,7 milyard dollar alınması planlaşdırılır.
Nazir əlavə edib ki, son üç ildə Tokio artıq Kiyevə 8,5 milyard dollardan çox büdcə dəstəyi verib.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
