Bakı, 23 iyul, AZƏRTAC

Yaponiyada fəaliyyət göstərən və baş ofisi İsveçrədə yerləşən “Amaris Consulting” şirkətinin data mütəxəssisi 27 yaşlı Kənan Məcidzadə AZƏRTAC-a müsahibəsində təhsil və iş həyatından, planlarından, yapon dilini öyrənmə prosesindən, yaponların Azərbaycan mədəniyyətinə olan marağından danışıb. Müsahibəni təqdim edirik.

-Yaponiya həyatınız necə başladı?

-Mən 2016-cı ildə Bakıda Eldar Quliyev adına 145 nömrəli tam orta məktəbi bitirmişəm. Daha sonra Bakı Ali Neft Məktəbində kimya mühəndisliyi ixtisası üzrə təhsil alaraq 2021-ci ildə məzun olmuşam. Yaponiya mənim üçün hər zaman xüsusi maraq doğuran ölkə olub. Məhz buna görə IV kursda oxuyarkən yapon dilini öyrənməyə başladım. Dilə olan marağım artdıqca Yaponiyada dil məktəbində təhsil almaq qərarına gəldim və Tokioda yerləşən Ohara Yapon Dili Məktəbini seçdim. Ancaq əsas məqsədim yalnız dil öyrənmək deyildi. Mən Yaponiyada işləmək, bu ölkənin iş mühitini yaxından tanımaq və peşəkar təcrübə qazanmaq istəyirdim. Dil məktəbi isə bu məqsədə gedən yolda mənim üçün ilk addım oldu.

-Yaponiyada aldığınız təhsil hədəflərinizə çatmaqda necə rol oynayıb?

-Oxuduğum məktəb mənə hər zaman böyük dəstək göstərib. Bununla yanaşı, uğurun yalnız məktəbdən asılı olmadığını düşünürəm. Mən də öz üzərimdə ciddi şəkildə çalışırdım. Dili gündəlik həyatda daim tətbiq etməyə çalışır, yapon marketində “part-time” işləyir, müxtəlif dil və mədəniyyət tədbirlərində iştirak edirdim. Bu yanaşma məni yalnız dərs materialları ilə kifayətlənən tələbələrdən fərqləndirirdi. Yəni təhsil mənə möhkəm baza verdi, lakin onu tamamlayan əsas amil şəxsi səylərim və davamlı öyrənmək istəyim oldu.

-Hazırda nə ilə məşğulsunuz?

-Hazırda “Amaris Consulting” şirkətində data konsultant kimi çalışıram. “Amaris Consulting” mərkəzi İsveçrənin Cenevrə şəhərində yerləşən və dünyanın 60-dan çox ölkəsində fəaliyyət göstərən beynəlxalq texnologiya konsaltinq şirkətidir. Mən şirkətin Tokio ofisində fəaliyyət göstərirəm. Bundan əvvəl Bakıda da data sahəsində çalışmışam. Bu baxımdan texniki tərəfdən böyük dəyişiklik yaşanmadı, çünki istifadə olunan bilik və bacarıqlar demək olar ki, eynidir. Əsas məqam fərqli iş mədəniyyətində eyni işi görmək oldu. Bu isə mənim üçün çox dəyərli təcrübədir.

-Data sahəsində uğurlu olmaq üçün hansı bacarıqlar vacibdir?

-Konsaltinq istənilən sahədə, ilk növbədə, insanlarla işləmək bacarığıdır. Buna görə də ən vacib keyfiyyət müştəri ilə düzgün ünsiyyət qurmaq və peşəkar münasibət göstərməkdir. Texniki biliklər əlbəttə ki, vacibdir. Ancaq həmin bilikləri müştərinin başa düşəcəyi formada izah etmək, onun əsl ehtiyacını düzgün müəyyənləşdirmək və uyğun həll yolu təqdim etmək uğurlu konsultantı digərlərindən fərqləndirən əsas xüsusiyyətlərdir.

-İş həyatınızda indiyədək ən maraqlı layihə hansı olub?

-Mən “Amaris Consulting” şirkətindən əvvəl “Woven by Toyota” şirkətində çalışırdım. Bu şirkət “Toyota Group”un tədqiqat və inkişaf istiqamətində fəaliyyət göstərən qurumudur. Layihənin əsas məqsədi avtomobillərin fiziki sınaqlarını mümkün qədər virtual mühitə keçirmək idi. Bildiyimiz kimi, real avtomobil testləri həm vaxt, həm də maliyyə baxımından olduqca bahalıdır. Biz isə virtual simulyasiyalar vasitəsilə həmin testləri həyata keçirərək xərcləri azaltmağa çalışırdıq. Texnologiyanın real sənaye problemlərinin həllinə necə töhfə verdiyini görmək mənim üçün son dərəcə maraqlı və motivasiyaedici təcrübə idi.

-Planlarınız barədə danışardınız. Azərbaycana qayıdaraq qazandığınız təcrübəni burada tətbiq etməyi düşünürsünüzmü?

-Hələlik uzunmüddətli planlardan danışmaq tezdir. Burada həm iş mədəniyyəti, həm də texnologiyalar baxımından öyrənəcəyim çox şey var. Hazırda əsas məqsədim mümkün qədər çox bilik və təcrübə toplamaqdır. Bununla belə, Azərbaycanla bağlı əlaqələrim heç vaxt kəsilməyib. Ailəm Bakıda yaşayır. İnanıram ki, burada qazandığım təcrübə gələcəkdə hansısa formada ölkəmə də fayda verəcək. Bunun necə olacağını isə zaman göstərəcək.

-Yaponiyada yaşamağın xoş və çətin tərəfləri nələrdir?

-Mənim üçün ən xoş tərəf gündəlik həyatın rahat və nizamlı olmasıdır. Qatarların dəqiqliyi, xidmətlərin keyfiyyəti, mağazaların işləmə sistemi və ümumilikdə şəhər infrastrukturu insanın həyatını xeyli asanlaşdırır. Çətin tərəfə gəldikdə isə düşünürəm ki, bu, yalnız Yaponiyaya aid deyil. İstənilən xarici ölkədə yaşamağın əsas çətinliyi fərqli mədəniyyətə uyğunlaşmaqdır. Bunun öhdəsindən gəlmək üçün açıqfikirli olmaq çox vacibdir. Qarşılaşdığınız yeniliklərə maraqla yanaşdıqda və onları qəbul etməyə hazır olduqda yeni ölkədə yaşamaq daha rahat və maraqlı olur.

-Süni intellekt və data sahəsinə marağı olan gənclərə hansı tövsiyələri verərdiniz?

-Dediyim kimi, kimya mühəndisliyi üzrə təhsili almışam. Yəni data sahəsinə tamamilə fərqli bir istiqamətdən gəlmişəm və bu, hər kəsin bu sahəyə keçid edə biləcəyini göstərir. Öyrənmə prosesində əsasən “Coursera” platformasından istifadə etmişəm. Bu gün isə seçim etmək üçün çox sayda keyfiyyətli platforma mövcuddur. Tövsiyəm belə olardı ki, ilk növbədə, ingilis dilini yaxşı səviyyədə öyrənmək lazımdır. Çünki ən keyfiyyətli resursların böyük hissəsi ingilis dilindədir. Həmçinin fundamental bilikləri möhkəm mənimsəmək, bilikləri praktikada sınamaqdan çəkinməmək, daha sonra bilikləri lazım olan istiqamətdə dərinləşdirmək lazımdır. Ən vacib məsələ istifadə etdiyiniz platforma deyil. Əsas olan öyrənmək istəyi, davamlı çalışmaq və yeni şeyləri sınamaq cəsarətidir.

-Azərbaycanlı gənc olaraq ölkəmizi Yaponiyada necə tanıdırsınız?

-Yaponlarla söhbətlər zamanı onları ən çox təəccübləndirən məqamlardan biri danışdığım dillərin sayıdır. Mən rus, ingilis, Azərbaycan, türk və yapon dillərində ünsiyyət qura bilirəm. Bu, adətən onların böyük marağına səbəb olur. Bundan əlavə, yaponlar Azərbaycan mətbəxi ilə yaxından maraqlanırlar. Onlara dolma, plov, kabab və digər milli yeməklərimizin şəkillərini göstərir, Azərbaycanın çay mədəniyyətindən danışır və bu dadları mütləq sınamağı tövsiyə edirəm. Fürsət olduqda isə Bakının simvollarını – Alov qüllələrini, İçərişəhəri və şəhərimizin müasir memarlıq nümunələrini onlara virtual şəkildə göstərirəm. Belə kiçik söhbətlər vasitəsilə ölkəmizi tanıtmağa və Azərbaycan haqqında müsbət təəssürat formalaşdırmağa çalışıram. Hətta bir dostum bu tanıtımlardan sonra Bakını və Azərbaycanı gəzmək üçün ölkəmizə səyahət etmişdi və burada gördükləri onu heyran etmişdi.

_{Müxbir - Günel Türksoy}