Yaponiyalı alim Mirzə Fətəli Axundzadənin fəlsəfi irsini tədqiq edəcək
Bakı, 4 sentyabr, AZƏRTAC
Yaponiyanın Ryukoku Universitetinin Tarix kafedrasının mühazirəçisi dosent Şinya Şionozaki Azərbaycan ədəbiyyatının görkəmli nümayəndəsi Mirzə Fətəli Axundzadənin fəlsəfi irsini tədqiq etmək məqsədilə AMEA Məhəmməd Füzuli adına Əlyazmalar İnstitutuna ezam olunub.
Bu barədə AZƏRTAC-a Əlyazmalar İnstitutundan məlumat verilib. İnstitutun elmi katibi dosent Əzizağa Nəcəfzadə qonağı M.F.Axundzadə yaradıcılığı ilə bağlı əlyazma materialları və əski çap kitabları, eyni zamanda, Ekspozisiya zalında nümayiş olunan nadir eksponatlar və əlyazma nüsxələri ilə tanış edib.
Əsas tədqiqat sahəsi M.F.Axundzadənin “Kəmalüddövlə məktubları” əsəri olan yaponiyalı alim iki həftə ərzində ezam olunduğu elmi-tədqiqat müəssisəsində görkəmli dramaturqun Əlyazmalar İnstitutunda saxlanılan şəxsi arxivi ilə də yaxından tanış olmaq istədiyini bildirib. Bu məqsədlə Şinya Şionozakiyə institutun şəxsi arxiv fondunda qorunan materiallar üzərində tədqiqat işləri aparmaq üçün müvafiq şərait yaradılıb.
Bölmənin digər xəbərləri
