Yaponlar Tokio Olimpiadası zamanı tamaşaçı sayının məhdudlaşdırılmasının tərəfdarıdır
Bakı, 7 oktyabr, AZƏRTAC
Yaponiya sakinləri arasında aparılan sosioloji sorğunun nəticələrinə görə, respondentlərin təxminən üçdə ikisi 2021-ci il iyulun 8-dən avqustun 8-dək Tokioda keçiriləcək Olimpiya Oyunlarını həyəcanla gözləyirlər.
AZƏRTAC xəbər verir ki, eyni zamanda, yaponların yarıdan çoxu stadionlarda azarkeş sayının məhdudlaşdırılmasının tərəfdarıdır.
Sorğuda 1202 nəfər iştirak edib. “Japan Times” nəşrinin məlumatına görə, pandemiya zamanı respondentlərin yalnız 15,6 faizi Oyunlara qarşı çıxıb. Yarışları boş tribunalar qarşısında görmək istəyənlərin də payı azdır - 11 faiz. Eyni zamanda, respondentlərin yalnız 7,2 faizi koronavirusla əlaqəli məhdudiyyətlərin ümumiyyətlə lazım olmadığını düşünür.
Yaponların əksəriyyəti, yəni 58,5 faizi tribunadakı tamaşaçı sayının ciddi şəkildə məhdudlaşdırılmasının tərəfdarıdır. Yeri gəlmişkən, indi ölkədə belə yarışlar keçirilir. Araşdırmalar göstərir ki, əhalinin 62,4 faizi Tokio Oyunlarının keçirilməsinin tərəfdarıdır.
Bölmənin digər xəbərləri
