Yaralansa da, yenidən döyüşlərə atılan qəhrəman tankçı VİDEO
Tovuz, 14 oktyabr, AZƏRTAC
Bu gün Vətən müharibəsinin şəhidi Yusif Ələsgərovun doğum günüdür. Tovuzda Ermənistanla sərhəddə Yuxarı Öysüzlü kəndində doğulub boya-başa çatan Yusif uşaqlığından hərbçi olmağı, düşməndən qisas almağı arzulayıb. 44 günlük müharibənin 42 günü döyüşlərdə iştirak edən qəhrəmanımız Xocavənd-Şuşa istiqamətində şəhadətə ucalıb.
AZƏRTAC xəbər verir ki, Yusifin atası birinci Qarabağ müharibəsinin iştirakçısı olub. Elə uşaqlıqdan atasına müharibə ilə bağlı çoxlu suallar verərmiş. Vətən müharibəsindəki qələbəmizi, əldə etdiyi uğurları da atası ilə paylaşırdı.
“Axırıncı dəfə Xocavənd-Şuşa istiqamətində döyüşdə iştirak edib. Mənə döyüşə getdiyini deməmişdi. Yoldaşları deyir ki, tankla birinci Yusifgil hərəkət edib. Düşmənin “Ural” maşınını vurub sıradan çıxarıblar. Gərgin döyüşlərdə erməni gülləsi tankın lüləsindən girib, lülədəki mərmi partlayıb. Oğlum da orada şəhid olub”, - deyə atası Yaşar Ələsgərov bildirib.
Yusif 2014-cü ildə müddətli həqiqi hərbi xidmətə çağırılıb. 2014-2016-cı illərdə Daxili Qoşunların “N” saylı hərbi hissəsində xidmət keçib. 2017-ci ildən Azərbaycan Silahlı Qüvvələrinin “N” saylı hərbi hissəsində müddətdən artıq həqiqi xidmət hərbi qulluqçusu kimi xidmət edib. 2020-ci il sentyabrın 27-də başlanan Vətən müharibəsi zamanı Füzuli, Xocavənd, Cəbrayıl və Qubadlının azadlığı uğrunda gedən döyüşlərdə tankçı kimi iştirak edib. Oktyabrın 24-də Qubadlı döyüşləri zamanı yaralanıb. Bunu ailəsindən gizlədən Yusif bir neçə gündən sonra yenidən döyüşlərə qoşulub.
Şəhid anası Sevinc Abdullayeva deyib: “Yusif tankda tuşlayıcı idi. Hər dəfə torpaqlarımız azad olunduqda, atasına zəng vurub deyirdi, sevincini atası ilə bölüşürdü. Tankını üç dəfə vurublar, bir dəfə də yanında mərmi partlayıb. Amma bu barədə bizə bir söz də deməyib. İndi oğlumun ruhu şaddır. Allah bütün şəhidlərimizə rəhmət eləsin”.
Yusif Ələsgərov noyabrın 7-də şəhid olub. Tovuzun Yuxarı Öysüzlü kəndində torpağa tapşırılıb. Kənddə digər şəhidlərlə bərabər Yusifin də xatirəsinə bulaq kompleksi tikilib.
Bölmənin digər xəbərləri
