Yeni nəşr: “Azərbaycan Respublikasının sosial-iqtisadi göstəriciləri beynəlxalq reytinqlərdə”
Bakı, 8 iyul, AZƏRTAC
Elm və Təhsil Nazirliyinin İqtisadiyyat İnstitutunun Maliyyə, pul-kredit siyasəti şöbəsinin aparıcı elmi işçisi Tanrıverdi Paşanın “Azərbaycan Respublikasının sosial-iqtisadi göstəriciləri beynəlxalq reytinqlərdə” adlı analitik-statistik bülleten çapdan çıxıb.
İnstitutdan AZƏRTAC-a bildirilib ki, nəşr Azərbaycan Respublikasının sosial-iqtisadi inkişafının beynəlxalq reytinq təşkilatlarının dünya ölkələri üzrə tərtib etdikləri ən vacib reytinq və indeks göstəricilərini əhatə edən məlumatların toplanılması və təhlili əsasında hazırlanıb.
Bülletendə əsas mikroiqtisadi göstəricilər, dövlət xərcləri və vergilər, neft ehtiyatları və neft hasilatı, enerji və ətraf mühit, beynəlxalq ticarət və investisiyalar, iqtisadi azadlıq, bank sisteminin sabitliyi, demoqrafiya kimi məsələlərə aydınlıq gətirilir, bəzi iqtisadi statistik məlumatların beynəlxalq və milli səviyyələrdə müqayisəsi aparılır.
İqtisadiyyat İnstitutunun Elmi şurasının qərarı ilə nəşr olunan kitabın elmi redaktoru iqtisad elmləri doktoru Rəsmiyyə Abdullayeva, rəyçiləri iqtisad elmləri doktoru Leyli Allahverdiyeva və iqtisad üzrə fəlsəfə doktoru, dosent Ələsgər Sarıyevdir.
Yeni nəşr elmi işçilər, ali məktəb müəllimləri, magistrant və doktorantlar, iqtisadçı ekspert və mütəxəssislər üçün nəzərdə tutulub.
Bölmənin digər xəbərləri
