Yeni seçilmiş Gürcüstan prezidentinin inaqurasiyasının proqramı tərtib edilmişdir
Tbilisi, 5 noyabr (AZƏRTAC). Yeni seçilmiş Gürcüstan Prezidenti Georgi Marqvelaşvilinin noyabrın 17-də keçiriləcək inaqurasiyası ilə əlaqədar yaradılmış dövlət komissiyasının növbəti iclasından sonra Gürcüstanın xarici işlər naziri Maya Pancikidze tədbirin Tbilisidə 4 yerdə keçiriləcəyini bildirmişdir.
Prezident parlament binasının həyətində and içəcək, sonra Qəhrəmanlar meydanına gedib ölkənin ərazi bütövlüyü uğrunda həlak olanların abidəsi önünə əklil qoyacaq, Rustaveli Teatrında bayram konserti təşkil olunacaq, yekunda isə qonaqlar üçün rəsmi qəbul keçiriləcəkdir.
Nazirin dediyinə görə, inaqurasiyada dövlət himni səslənəcək, dövlət bayrağı qaldırılacaq, hərbi komponentdən də mütləq istifadə ediləcəkdir.
M.Pancikidze tədbirdə bədxərcliyə yol verilməyəcəyini, inaqurasiyanın Avropa standartlarına uyğun təşkil olunacağını qeyd etmişdir. O demişdir ki, dəvətnamələr dünyanın 70 ölkəsinə, həmçinin Eduard Şevardnadze və Mixail Saakaşviliyə də göndərilmişdir.
İnaqurasiyanın saat 13-dən 18-dək davam edəcəyi bildirilir.
İslam Əliyev
AZƏRTAC-ın xüsusi müxbiri
Tbilisi
Bölmənin digər xəbərləri
