DÜNYA
Yeni təhsil ilində Ukraynada məktəblərin 80 faizindən çoxu bomba sığınacaqları ilə təchiz olunub
Kiyev, 3 sentyabr, AZƏRTAC
Ukraynada təxminən 13 min məktəb fəaliyyət göstərir, onların 80 faizindən çoxu bomba sığınacaqları ilə təchiz olunub.
AZƏRTAC xəbər verir ki, bunu milli telemarafonun efirində Ukraynanın təhsil və elm nazirinin müavini Andrey Vitrenko deyib.
“Bu gün Ukraynada 12900-dən çox məktəb fəaliyyət göstərir. Əlimizdə olan və topladığımız məlumatlara görə, Ukraynada məktəblərin 80 faizindən çoxu artıq sığınacaqlarla təchiz olunub”, - deyə təhsil nazirinin müavini bildirib.
Onun sözlərinə görə, bomba sığınacaqlarının modernləşdirilməsi prosesi davam edəcək. A.Vitrenko əlavə edib ki, dövlət təhlükəsiz təhsil mühitinin inkişafı üçün artıq 1,5 milyard qrivnadan çox vəsait ayırıb.
Kiyevdə 12 məktəb var ki, orada sığınacaq təchiz etmək mümkün deyil. Hazırda yeni tipli bomba sığınacaqların tikintisi ilə bağlı dörd pilot layihə həyata keçirilir.
O, həmçinin əlavə edib ki, müəyyən səbəblərə görə sığınacaq yaratmaq mümkün olmayan təhsil müəssisələrində yeni tipli sığınacaqlar tikiləcək.
Xatırladaq ki, yayda Ukraynada bütün ölkə üzrə bomba sığınacaqlarının vəziyyətinin genişmiqyaslı yoxlanışı aparılıb. Nəticələr məyusedici olub. Prezident Volodimir Zelenski sığınacaqların düzgün saxlanmaması və girişin təmin edilməməsinə görə cinayət məsuliyyətinin artırılması barədə göstəriş verib.
AZƏRTAC-ın xüsusi müxbiri