Yeni yeraltı xətt Malmö ilə Kopenhageni birləşdirəcək
Stokholm, 22 oktyabr, Nərgiz Cəfərli, AZƏRTAC
İsveçin Malmö şəhərində Malmö ilə Kopenhagen birləşdirəcək yeraltı xətti olan Öresundsmetron layihəsinə hazırlıq çərçivəsində ilk sınaq qazma işlərinə başlanılıb.
AZƏRTAC xəbər verir ki, yeni metroda qatarlar hər 90 saniyədən bir hərəkət edəcək və şəhərlər arasında gediş-gəliş vaxtını 40 dəqiqədən 20 dəqiqəyə endirəcək.
Təxminən 60 milyard kron (5,4 milyard dollar) dəyərində olan layihə üzrə on ildən artıqdır ki, iş aparılır. İsveç və Danimarka hökumətlərinin rəsmi qərarının olmamasına baxmayaraq, texniki və geoloji tədqiqatlar fəal şəkildə aparılır.
Malmö rəsmilərinin sözlərinə görə, qazma işləri tikinti başlamazdan əvvəl riskləri və xərcləri qiymətləndirmək üçün lazımdır.
Danimarka tərəfində Kopenhagen səlahiyyətliləri M5 yeni metro xəttinin tikintisini təsdiqləyiblər və o, gələcəkdə Eresunn metrosunun bir hissəsi olacaq.
Siyasətçilər vurğulayırlar ki, bu layihə Kopenhageni Malmö ilə birləşdirən Eresunn körpüsündə tıxacları aradan qaldırmaq üçün lazımdır, çünki burada yük və sərnişin daşımalarının həcmi artır.
Qiymətləndirmələrə görə, metro İsveç ilə Danimarka arasında iqtisadi və sosial əlaqələri gücləndirəcək, bir milyondan çox insan üçün yeni əmək bazarı yaradacaq.
Hər şey plana uyğun gedərsə, xəttin Danimarka hissəsi 2036-cı ilə qədər, İsveç hissəsi isə bir neçə ildən sonra qoşulacaq.
Bölmənin digər xəbərləri
