“Yer saatı” aksiyasına Ekologiya və Təbii Sərvətlər Nazirliyi də qoşulur
Bakı, 30 mart, AZƏRTAC
Ekologiya və Təbii Sərvətlər Nazirliyi “Yer saatı” aksiyasına qoşularaq bu gün saat 20:30-da B.Ağayev 100A, H.Əliyev prospekti 50 ünvanlarındakı və digər tabeli qurumlarının binalarının fasadlarının işıqlandırılmasını 1 saatlıq söndürəcək.
Bu barədə AZƏRTAC-a nazirliyin mətbuat xidmətindən məlumat verilib.
Qeyd edək ki, “Yer saatı” milyonlarla insanı iqlim dəyişikliyinin dayandırılması uğrunda səfərbər edən bütün dünyada keçirilən ətraf mühitə həsr edilmiş ən böyük hərəkatdır. Ümumdünya Vəhşi Təbiət Fondu (WWF) “Yer saatı” aksiyasını hər il martın axırıncı şənbə günü keçirir və hər kəsi, dövlət və kommersiya təşkilatlarını həyati əhəmiyyət daşımayan bütün elektrik cihazlarını bir saatlığa söndürməyə çağırır.
İlk dəfə bu tədbir (WWF) tərəfindən “The Sydney Morning Herald” qəzeti ilə birgə 2007-ci ildə Avstraliyada keçirilib. Azərbaycanda isə rəsmi olaraq 2011-ci ildən qeyd edilir.
“Yer saatı” aksiyası zamanı böyük şəhərlərdəki məşhur binaların fasadlarının işıqları bir saatlıq söndürülür. Ənənəvi olaraq bu aksiyada 160-dan çox ölkə və 7000-dən çox şəhər iştirak edir.
Aksiya iştirakçıları bu rəmzi hərəkətlə ictimaiyyətin diqqətini iqlim dəyişikliyinin yaratdığı təhlükələrə yönəldir, enerjiyə qənaəti təşviq edirlər.
Gəlin, planetimiz naminə işıqları bir saatlıq söndürərək ona diqqət, qayğı və sevgimizi nümayiş etdirək!
Bölmənin digər xəbərləri
