Yığmanın baş məşqçisi: Əsas hədəfimiz beynəlxalq turnirlərdə uğurlu çıxış etməkdir
Bakı, 15 yanvar, AZƏRTAC
“Mənə göstərilən etimadı doğrultmağa çalışacağam”.
Bu sözləri AZƏRTAC-a açıqlamasında U-21 yığmasına baş məşqçi təyin olunan Elnur Amanov deyib.
O, əsas hədəflərinin beynəlxalq turnirlərdə uğurlu çıxış etmək olduğunu bildirib: “Bildiyiniz kimi, 21 yaşlılar arasında Avropa çempionatı keçirilsə də, dünya çempionatı təşkil olunmurdu. Lakin Beynəlxalq Taekvondo Federasiyası mundialın reallaşacağı barədə qərar qəbul edib. Biz də bu yarışlarda xalqımızı sevindirmək istəyirik. Mənim rəhbərlik edəcəyim yığmada 17-21 yaş aralığında olan uşaqlar mübarizə aparacaqlar. Azərbaycan Taekvondo Federasiyası təqvimə uyğun olaraq, 21 yaşlılar arasında ölkə çempionatı keçirəcək. Heyət barədə konkret nəsə yoxdur. İdmançılar bir araya gəldikdən sonra təlim-məşq toplanışı da məlum olacaq”.
Qeyd edək ki, Elnur Amanov bu təyinatla yanaşı, böyüklərdən ibarət milli komandanın böyük məşqçisi postunu qoruyub saxlayır.
Bölmənin digər xəbərləri
