YUNAN-ROMA GÜLƏŞİ ÜZRƏ GƏNCLƏRDƏN İBARƏT AZƏRBAYCAN YIĞMASI QİTƏ BİRİNCİLİYİNDƏ 4 MEDAL QAZANMIŞDIR
Slovakiyanın Koşitse şəhərində gənclər arasında güləş üzrə Avropa çempionatı davam edir.
Azərbaycan Güləş Federasiyasının mətbuat xidmətindən AZƏRTAC-a bildirmişlər ki, yunan-Roma güləşçiləri qitə birinciliyində iki qızıl, bir gümüş və bir bürünc medal qazanmışlar.
İdmançılarımızdan Həsən Əliyev (55 kq) və Rafiq Hüseynov (74 kq) bütün rəqiblərinə qalib gələrək fəxri kürsünün ən yüksək pilləsinə qalxmışlar.
Kamran Məmmədov (60 kq) isə yalnız finalda Gürcüstan təmsilçisinə uduzaraq gümüş medala layiq görülmüşdür.
Digər idmançımız Xurşud Babaşov (50 kq) isə çempionatı 3-cü yerdə başa vurmuşdur.
Hələlik idmançılarımız Avropa çempionatında 3 qızıl, 2 gümüş və 1 bürünc medala sahib olmuşlar.
Bu gün mübarizəni sərbəst güləşçilər davam etdirəcəklər.
Turnirə iyulun 20-də yekun vurulacaqdır.
Bölmənin digər xəbərləri
