ZAQATALA ÇAYÇILARI PAYIZ YIĞIMINI DA UĞURLA BAŞA ÇATDIRMIŞLAR
Zaqatala, 18 oktyabr (AZƏRTAC). Zaqatala rayonunun çay plantasiyalarında yaşıl çay yarpağı yığımı müvəffəqiyyətlə başa çatmışdır.
Rayon icra hakimiyyətindən bildirmişlər ki, havaların əlverişli keçməsi, habelə plantasiyalara yüksək aqrotexniki qulluq nəticəsində əvvəlki illərdən fərqli olaraq fermerlər payız mövsümündə də məhsul yığmışlar. Son illərdə ilk dəfə olaraq payız mövsümündə rayonun çay plantasiyalarında yığım aparılmış, 2,3 ton yaşıl çay yarpağı tədarük edilmişdir.
Ümumiyyətlə, 2009-cu ildə rayonun çay istehsalçıları plantasiyalardan 44,7 ton yaşıl çay yarpağı yığmışlar. Tədarük edilmiş yaşıl çay yarpağı rayonda fəaliyyət göstərən “Zaqatala-Çay” Məhdud Məsuliyyətli Cəmiyyətində emal olunaraq, ondan 10 min 462 kiloqram quru çay əldə edilmişdir. İstehsal olunmuş məhsul, əsasən, respublikanın daxili bazarlarında satılır. Xatırladaq ki, hazırda rayonda məhsuldar çay plantasiyalarının ümumi sahəsi 60 hektara yaxındır.
Bölmənin digər xəbərləri
