Ziya Zakir Acar: Vətən və torpaq qəhrəman igidlərin şücaətinə əbədi şahidlik edəcək
Ankara, 12 oktyabr, AZƏRTAC
Azərbaycanın qazandığı tarixi Zəfər hər bir türkiyəli üçün qürur mənbəyidir. Otuz il yaşadığımız Qarabağ acısına birdəfəlik son qoyulmasına görə başda Müzəffər Ali Baş Komandan İlham Əliyev olmaqla, Azərbaycan Ordusuna, Azərbaycan xalqına minnətdarıq. Şəhidlərin ruhu qarşısında ehtiramla baş əyir, qazilərimizə Allahdan şəfa diləyirik. Onlara əbədiyyətə qədər borcluyuq.
Bu fikirləri AZƏRTAC-a açıqlamasında Türkiyədə fəaliyyət göstərən İğdır-Azərbaycan Dil, Tarix və Mədəniyyət Birliyini Yaşatma və Dəstəkləmə Dərnəyinin sədri, saxta “erməni məsələsi” üzrə tədqiqatçı-yazar Ziya Zakir Acar ifadə edib.
İşğaldan azad olunan hər qarış torpağın əziz və müqəddəs olduğunu vurğulayan Ziya Zakir Acar deyib: “Azərbaycanlı igidlər qanları və canları ilə dövlətçilik tariximizin ən şərəfli səhifələrindən olan Qarabağ Zəfərini yazıblar. Zaman keçdikcə onların rəşadətinin əhəmiyyəti daha aşkar şəkildə görünəcək və yolumuza işıq salmağa davam edəcək. Gələcək nəsillər bu qəhrəmanların şərəfli döyüş yolunu kitablardan, kinolardan, romanlardan öyrənəcəklər. Amma Vətən və torpaq onların şücaətinə əbədi şahidlik edəcək”.
Sabir Şahtaxtı
AZƏRTAC-ın xüsusi müxbiri
Ankara
Bölmənin digər xəbərləri
