“Zorakılığa qarşı susma” - Qubada maarifləndirmə tədbiri
Quba, 5 dekabr, Elxan Yusifli, AZƏRTAC
Dövlətimiz tərəfindən insan hüquqlarının tərkib hissəsi olan qadın və uşaq hüquqları, gender bərabərliyi sahəsində milli qanunvericiliyin təkmilləşdirilməsi və yeni normativ-hüquqi aktların qəbul edilməsi bu sahələrdə müsbət nəticələrin əldə edilməsinə səbəb olub.
AZƏRTAC-ın bölgə müxbiri xəbər verir ki, bu barədə Qubada “Gender əsaslı zorakılığa qarşı 16 günlük fəallıq” kampaniyası çərçivəsində “Zorakılığa qarşı susma” mövzusunda keçirilən tədbirdə bildirilib. Tədbir Quba Rayon İcra Hakimiyyətinin və Quba rayon Heydər Əliyev Mərkəzinin birgə təşkilatçılığı, Quba-Xaçmaz Regional Təhsil İdarəsinin Quba rayonu üzrə təhsil sektorunun, Azərbaycan Respublikasının İnsan hüquqları üzrə müvəkkilinin (ombudsmanın) Şimal regional mərkəzinin, ADPU-nin Quba filialının tərəfdaşlığı ilə keçirilib.
Bildirilib ki, ölkəmizdə “Qadınlara qarşı ayrı-seçkiliyin bütün formalarının ləğv olunması haqqında”, qadın və uşaq hüquqları sahəsində dövlət siyasətinin formalaşması, normativ hüquqi bazanın təkmilləşdirilməsi, “Gender (kişi və qadınların) bərabərliyinin təminatları haqqında” və “Məişət zorakılığının qarşısının alınması haqqında” Azərbaycan Respublikası qanunlarının qəbul edilməsi və institusional islahatlar bu istiqamətdə atılan mühüm addımlardır.
Natiqlər qeyd edib ki, qadınların cəmiyyətin bütün sahələrində fəallığının artırılması, uşaq problemlərinin həllinin önə çəkilməsi istiqamətində görülən işlər, siyasi, iqtisadi və sosial sahələrdə gender bərabərliyi amilinə daha çox əhəmiyyət verilməsi insan hüquqlarının qorunmasına öz bəhrəsini verməkdədir. Lakin təcrübə göstərir ki, fundamental insan hüquqlarının məhdudlaşdırılması və pozulması halları, zorakılıq, o cümlədən cinsi mənsubiyyətə görə zorakılıq halları cəmiyyətin aşkar mənfi münasibətinə və dözümsüzlüyünə, habelə son illərdə ölkəmizdə həyata keçirilən təsirli tədbirlərə baxmayaraq, dünyanın bir çox ölkələrində olduğu kimi, Azərbaycanda da problem olaraq qalmaqdadır.
Tədbirdə məişət zorakılığı qurbanlarına göstərilən xidmətlər, QHT və dövlət qurumları arasında əməkdaşlıq, hüquq-mühafizə orqanlarında məişət zorakılığına qarşı mübarizə tədbirləri və gender komissiyalarının fəaliyyəti: problemlər və təkliflər mövzularında çıxışlar dinlənilib.
Kampaniya 25 Noyabr - Qadınlara qarşı Zorakılıqla Beynəlxalq Mübarizə Günündən başlayaraq, 10 Dekabr – Beynəlxalq İnsan Hüquqları Gününədək davam edir. Kampaniya çərçivəsində hər il müxtəlif formatda tədbirlər həyata keçirilir, dünya ictimaiyyətinə qadınlara və qızlara qarşı zorakılığın qarşısını almaq və aradan qaldırmaq çağırışları edilir.
Bölmənin digər xəbərləri
