Beynəlxalq Müəllimlər Günü Qarabağ bölgəsində müxtəlif tədbirlərlə qeyd edilib
Tərtər, 5 oktyabr, AZƏRTAC
Tərtər şəhərində Beynəlxalq Müəllimlər Günü münasibətilə keçirilən tədbirin iştirakçıları əvvəlcə ümummilli lider Heydər Əliyevin abidəsi önünə tər gül dəstələri qoyub, Ulu Öndərin xatirəsini ehtiramla yad ediblər.
Gənclər Mərkəzində davam edən tədbirdə rayon icra hakimiyyətinin başçısı Müstəqim Məmmədov və təhsil şöbəsinin müdiri Surxay Mirzəyev müəllimləri əlamətdar gün münasibətilə təbrik edib, təhsilə göstərilən diqqət və qayğıdan, rayon müəllimlərinin qazandığı uğurlardan danışıblar.
Bildirilib ki, rayonun builki məzunlarından 265-i ali, 65-i orta-ixtisas məktəblərinə, 6 nəfər C.Naxçıvanski adına hərbi liseyə qəbul olunub. İmtahanlarda 10 nəfər 600-dən, 19 nəfər isə 500-dən yuxarı bal toplayıb.
Qeyd edilib ki, rayon müəllimlərindən beşi “Əməkdar müəllim” adına, beşi “Tərəqqi” medalına, dörd nəfər “Qabaqcıl maarif xadimi” döş nişanına layiq görülüb. Bayram ərəfəsində isə şəhər 2 nömrəli məktəb-liseyin müəllimi Mehriban Abbasova “Tərəqqi” medalı ilə təltif edilib.
Mərasimdə bir qrup qabaqcıl təhsil işçisinə fəxri fərman və qiymətli hədiyyələr təqdim olunub.
X X X
Ağcabədi rayonunun müəllimləri öz peşə bayramlarını - Beynəlxalq Müəllimlər Gününü yüksək əhvali-ruhiyyə ilə qeyd ediblər.
Təhsil işçilərinin, ziyalıların iştirak etdikləri tədbirdə Ağcabədi Rayon İcra Hakimiyyətinin başçısı Şahin Məmmədov, təhsil şöbəsinin müdiri Solmaz Rəhimova və başqaları müəllimləri peşə bayramları münasibətilə təbrik edib, gənc nəslin təlim-tərbiyəsi işində onların əməyini və rolunu yüksək dəyərləndiriblər.
Diqqətə çatdırılıb ki, hazırda Ağcabədi rayonunun təhsil müəssisələrində gənc nəslin təlim-tərbiyəsi ilə 2500-dən artıq müəllim məşğul olur. Son illər müəllimlərdən 8 nəfəri “Əməkdar müəllim” fəxri adına layiq görülüb, 7 nəfər “Tərəqqi” medalı, 5 nəfər “Qabaqcıl təhsil işçisi” döş nişanı ilə təltif olunub. Fərəhli haldır ki, Azərbaycan Prezidentinin müvafiq Sərəncamı ilə Hacıbədəlli kənd tam orta məktəbin müəllimi Ceyhunə Rəhimova “Tərəqqi” medalı ilə təltif edilib.
Bayram süfrəsi arxasında davam edən tədbirin sonunda rayonun bir qrup qabaqcıl müəlliminə fəxri fərmanlar təqdim olunub.
X X X
5 oktyabr - Beynəlxalq Müəllimlər Günü xocavəndli məcburi köçkünlərin məskunlaşdıqları Beyləqan rayonu ərazisindəki Xocavənd qəsəbəsində də qeyd edilib. Xocavənd rayonunun təhsil işçiləri ümummilli lider Heydər Əliyevin qəsəbədəki abidəsi önünə tər gül dəstələri qoyub, dahi rəhbərin xatirəsini ehtiramla yad ediblər.
Rayon icra hakimiyyəti başçısının müavini Əfsanə Quliyeva ölkəmizdə təhsil sahəsində aparılan dövlət siyasətindən danışıb, Beynəlxalq Müəllimlər Günü münasibətilə təhsil işçilərini təbrik edib, onlara çətin və eyni zamanda, şərəfli işlərində uğurlar arzulayıb. Bildirib ki, əsası ulu öndər Heydər Əliyev tərəfindən qoyulan və bu gün Prezident İlham Əliyev tərəfindən uğurla davam etdirilən təhsil islahatları, qəbul olunan Dövlət Proqramları hər bir müəllim üçün stimul yaradır.
X X X
Beyləqan rayonunun təhsil işçiləri ümummilli lider Heydər Əliyevin abidəsi önünə tər gül dəstələri qoyub, Ulu Öndərin xatirəsini ehtiramla yad ediblər.
Gənclər Mərkəzində keçirilən tədbirdə çıxış edənlər müəllimləri əlamətdar gün münasibətilə təbrik edib, əsası ulu öndər Heydər Əliyev tərəfindən qoyulan milli təhsil konsepsiyasından, Prezident İlham Əliyevin rəhbərliyi altında aparılan dövlət təhsil siyasətindən, bu sahədə əldə olunan uğurlardan danışıblar.
Bildirilib ki, respublikamızın bütün bölgələrində olduğu kimi, Beyləqan rayonunda da təhsilin inkişafı, onun maddi-texniki bazasının möhkəmləndirilməsi istiqamətində mühüm işlər görülür. Son beş ildə rayonda 10 məktəb binası inşa edilib, üç məktəb əsaslı təmir olunub. Yeni tikilən və əsaslı təmir olunan məktəblər müasir avadanlıqla tam təchiz edilib. Təhsilə göstərilən yüksək dövlət qayğısının nəticəsidir ki, ali məktəblərə qəbulun səviyyəsi ildən-ilə artır. Bu il rayonun orta ümumi təhsil məktəblərini bitirən məzunlardan 241-i müxtəlif ali məktəblərə daxil olub. Məzunlardan 14-ü 500-dən, yeddisi isə 600-dən yuxarı bal toplayıb.
Tədbirdə rayonun qabaqcıl müəllimlərindən bir qrupuna fəxri fərmanlar təqdim edilib.
Bölmənin digər xəbərləri
